Training constante pa e gran Tributo na Musica di Carnaval ta sigui

Evento di Gala ta dia 5 di Januari 2024 

ORANJESTAD (AAN): Falta menos di un luna mas pa Aruba prepara pa bay mira e evento grandi cu ta bay habri 2024 cune.

   E compania dinamico Setar NV a anuncia un Gala event grandi cu lo ser teni dia 5 di Januari 2024, y esaki a bin debi cu pa hopi tempo caba Setar a dedicando su mes masha hopi pa sostene Carnaval di Aruba, y awor cu ta bay festeha 70 aniversario di Carnaval, y a dicidi na haci un dedicacion amplio den e spectrum cu ta cubri musica carnavalesco.  E keda brainstorm riba e homenahe, y esaki a desemboca awor den un gran evento di gala.

   Ta trata aki di e evento cu ta “Tribute to 70 Years of Carnival Music”.  E ta stipula pa tuma lugar riba Diabierna dia 5 di Januari 2024 den Renaissance Convention Center.

   Durante e anochi publico lo recorda e mihor Roadmarchnan cu a sa domina nos cayanan durante 70 aña di Carnaval, e fiesta cultural mas grandi cu Aruba ta celebra.  Loke tin hende den hopi anticipacion, ta cu e Tributo aki ta worde haci na un forma hamas presenta prome.  Esey ta den forma di un orquesta completo principal cu lo ta riba escenario.

   E tipo di orquesta aki yama ‘Big Band’ cu como 13 musico tocando instrumento di blaas, y cu mas musico combina di Aruba y di exterior.  Nan lo produci musica di calidad riba stage, y e cancionnan aki lo bay worde graba pa keda den archivo pa cu historia di Carnaval di Aruba.

  E potretnan aki ta ilustra e esfuerso siman pasa di e cantantenan pa trece lo miho den e Tributo aki.  Bao guia di nos experto Tica Giel, nan a haya tips and tricks pa nan presentacion lo ta algo espectacular.

   No perde e oportunidad pa ta parti di e "Tribute to 70 Years of Carnival Music "! Uni cu nos pa un anochi inolvidabel caminda lo recorda exitonan di Carnaval di ora cu el a cuminsa te awor, cu e miho cantantenan.

   Join nos pa un anochi di magia musical unda cu Carlos Bislip lo dirigi un orquesta Big Band Orkest cu mas cu 25 cantante pa presenta e canticanan cu a contribui pa forma e Carnaval di Aruba durante e ultimo decadanan

   Ticket ta obtenibel den Pay.aw y tur Teleshop di Setar NV.  Sigura bo luga pa un anochi di nostalgia, festeho, y briyo musical!

   Pa reserva un mesa di 10 persona, bo por manda mensahe na WhatsApp 297 566-1588.  No keda afo, bin celebra e experencia unico aki! Uni pa festeha Carnaval y Cultura di Aruba door di e magia di musica.

   E Tributo aki lo cuminza pa 8:30 pm, y a splica cu portanan ta habri caba for di 7:00 pm.  Nan ta mira cu e evento lo bay ta uno sold-out, pues cumpra bo ticketnan adelanta.