Edsel Figaroa, lider di sindicato TOPPA:
ORANJESTAD (AAN)-- Edsel Figaroa, Presidente di Sindicato TOPPA, den entrevista cu Matutino DIARIO a menciona cu el a y ta bisa tur gobierno, cu nan mester zorg pa trece suficiente hende pa traha den KIA, como Bewaarder y Beveiliging.
El a subraya cu e ta conta pa Cuerpo di Polis, Brandweer, Douane, etc., pero e situacion alarmante aworaki ta na KIA.
“Mas ainda, aki cinco aña tin alomenos diesdos Bewaarder cu lo bay cu pensioen; kiermen, 19 lo keda. Mester bin un solucion urgentemente”, Figaroa a señala.
El a relata cu siman pasa, segun e tin entendi, e Minister a bishita KIA y e trahadornan tabata hopi positivo pensando cu nan lo a bay haya bon noticia pa nan, pero a resulta cu nan no a haya nada positivo.
“Es mas, despues di e bishita, mi a haya hopi yamada pa bisa mi cu nan kier papia cu TOPPA, pasobra nan ta bay subi caya. P’esey mes mi a bisa nan ‘no, warda mi un rato, pa haci e entrevista, y despues di esey nos ta sigui papia. Ami ta pendiente durante e dia aki pa mi tuma contacto cu nan. Ami ta traha a base di peticion di miembronan, no a base di accion, etc., mi trabao ta pa purba evita accion y yega na solucion. Pero ora bo no ta yega na dje, bo tin cu bay mas leu”, e lider sindical a declara.
El a menciona cu TOPPA a manda varios carta pa Minister. Mas of menos un cinco pa seis luna atras, nan a haya un reunion cu e Minister, unda nan kier a atende cuater diferente situacion di diferente departamento, y el a bisa cu e ta duna cada un mey ora, pero den 20 minuut pa mey ora el a atende tur cos den pura, pasobra e mester a bay atende algo otro. “El a laga nos sa cu e ta bay reuni cu nos pronto bek, cu e ta avisa nos, pero nada te awe. Nos a manda p’e diferente carta pero mi no kier bay den detaye. P’esey p’ami tin un situacion
urgente y e mester tuma medida riba dje”, presidente di TOPPA, Edsel Figaroa a remarca.
