Diabierna 6 di maart,
Bold Properties Empoderando Hende muhe!
ORANJESTAD (AAN): Riba 6 di maart, Bold lo presenta su di 3 rd annual special seminar, en conexion cu International Women's Day y nan fecha di inauguracion!
E iniciativa aki nace for di un vision cla: crea un movimiento di sosten, inspiracion y crecemento entre muhenan na Aruba.
Bold tin 13 hende muhe cu ta traha hunto pa logra nan metanan profesional y personal. Fundamental na Bold; ora un muhe yuda otro muhe crece, tur dos ta gana.
Segun representantenan di Bold, un di e camindanan mas poderoso pa yega na nan meta ta precisamente ora nan dicidi yuda otro.
Motibo pa amplia e impacto y invita mas hende muhenan di nos comunidad pa forma parti di un experiencia cu lo inspira y fortalece.
E evento lo enfoca riba temanan relevante cu ta motiva, reflexiona, y yuda reconoce bo potencial y para firme den bo propio capacidad.
Lo crea un espacio unda hende muhenan por comparti ideanan, gana confianza y siña di experiencia di otro, cu interaccion y construi relacionnan positivo basa riba bon energia y respet mutuo. E intencion ta cla: educa, sostene y empodera cada hende muhe.
Aruba ta bendiciona cu hopi muhe cu a tuma posicionnan importante y cu ta haci un diferencia real den negoshi, liderato y den nos sociedad. Y ora hende muhe traha hunto, e impacto ta aun mas grandi.
