Angela Ras, director di CEDEHM:
*CEDEHM lo enfoca riba e slogan aki “Duna pa gana”
ORANJESTAD (AAN)-- Den entrevista cu Matutino DIARIO, señora Angela Ras, Director di CEDEHM (Centro di Desaroyo di Hende Muher), a elabora riba e slogan di “Dia Internacional di Hende Muher 2026”, cu ta wordo conmemora e proximo Diadomingo 8 di Maart.
Pa e fecha aki e slogan mundial pa e dia
aki ta “# Give to Gain”. Señora Ras a elabora tocante e esencia di “Give to Gain”.
Give ta pa stimula e comunidad pa duna y pa esaki CEDEHM a uni cu Cruz Cora y hunto nan ta bay haci un colecta.
“Pero lo ta pa mi duna algo, pa mi haya algo. E algo cu nos ta haya ta un comunidad mas ekitativo. Anto, p’esey CEDEHM a scoge e doe mee e slogan aki, pa motibo cu nos ta bay enfoca riba nos hendenan muher dunando esnan mas vulnerable nos ta haya hopi, no na material pero un comunidad miho pa nos, miho pa nos yiunan, miho pa nos tur”, Angela Ras a expresa.
El a subraya cu hende muher t’ey henter aña y ta hopi interesante cu nan mes den CEDEHM tin diferente generacion, y ta hopi interesante con nan ta wak cosnan y con e mes ta wak cosnan.
Angela Ras a splica cu te cu nan haci 18 aña ta hende muher, pero prome cu esey nan ta mucha muher, y esnan cu ta mire di otro manera, no ta determina ken nan ta.
“Nan ta mucha muher te ora nan haci 18 aña. Ora nan ta haci 18 aña nan ta hende muher. CEDEHM semper ta boga pa bo respeta hende muher y un di nos metanan ta pa concientiza pueblo pa respeta hende muher”, el a reitera.
Pa durante 2026 nan ta sigui cu e proyectonan cu CEDEHM a bin ta elaborando tur e añanan aki, manera grupo di combersacion, nos miho version, y traha hunto cu otro instancianan.
