Director di FPNA Tyson Lopez:
ORANJESTAD (AAN)—Director di Fundacion Parke Nacional Aruba (FPNA) señor Tyson Lopez, a duna di conoce den entrevista cu DIARIO, cu Conchi lo haya atencion pa esaki haya un miho forma y un miho bista, como cu e ta un di e atraccionnan mas bishita tanto pa turista como pa hende local.
Tin un strategia cu ta guiando FPNA pa e proximo diez añanan, y parti di e strategia aki ta encera drecha cierto infrastructuranan pa seguridad di e personal di PNA y tambe pa su bishitantenan.
Conchi ta un di e areanan mas bishita di Parke Nacional Arikok, y tambe un di e areanan mas bishita na Aruba.
“Hopi turista cu ta bishita Parke Nacional Arikok ta bishita Conchi y esaki ta haci cu durante tempo nos ta mira cu nos mester drecha e infrastructura pa carga tambe esaki. Nos a cuminza pa traha riba e trapinan eynan pa haci nan mas safe, cu personanan por subi y baha. Actualmente nos ta bay continua cu esaki y nos ta trahando en colaboracion cu ATA cu ta yuda nos financieramente, pa drecha solamente e trapi di e conchi pero tambe otro trapinan cu nos tin den Parke Arikok, entre otro Dos Playa, Boca Prins, Quadirikiri, cu ta trapinan cu nos tin cu pone pa garantiza e seguridad di e bishitante”, Tyson Lopez a relata.
Lopez a agrega cu semper tin cu analiza con e infrastructura ta sostene e trabao di conservacion. Por ehemplo bo ta crea un path, pa mantene e hendenan den un direccion pa un cierto area.
“Si bo no tin un path anto bo ta cana tur caminda pesey semper bo infrastructura mester support bo trabao di conservacion. Locual nos ta haciendo, eigenlijk nos ta yame un ‘Visitor amenities master plan’ y e trapinan ta parti di dje. Por ehemplo, e shelternan nos a caba di entrega un proposicion cerca TPEF (Tourism Product Enhancement Fund), pa yuda nos hisa e calidad di infrastructura di Parke, cu ta gacebo, miho stacionamento miho indica, no solamente na conchi pero na e dos cuebanan pa, eigenlijk, trece un miho producto bek di Parke pa e area”, Tyson Lopez a señala.
Di parti di FPNA mes, nan ta bay haci un “safety” unda lo drecha na entrada di Fader Piet, unda actualmente casi no ta sinti cu bo a drenta un parke, pero ta bay pone e nomber di “Parke Nacional Arikok” aki banda. “Lo drecha e edificionan tambe, haci nan mas comodo pa haci nan mas comodo pa nos empleadonan y akinan tambe nos lo tin un nomber, pasobra ora bo ta yega no tin un nomber. Pa e ta mas visible cu bo a yega Parke Nacional. Tambe nos tin hopi trabao di mantenimento pa haci”, Director di FPNA a informa.
