Top Chef Charbel Hayek a briya durante evento culinario na Mercát

ORANJESTAD (AAN):  Den fin di siman, Mercat na Aruba Marriott Resort & Stellaris Casino tabata anfitrion di

un evento culinario extraordinario cu presencia di e talentoso ganador di Top Chef Middle East, Charbel Hayek.

            Prensa local a ricibi un invitacion special pa testifica e maestria culinario di Chef Charbel durante un 6-course dinner cu su 'wine pairing'. E menu, cu ta basa riba un concepto mediteraneo exkisito, a cautiva tur e invitado cu cada plato.

            Cada plato a demostra e habilidad y creatividad di Chef Charbel den cushina, brindando un experiencia culinario sin igual. E evento aki no solamente a resalta e nivel halto di e cushina mediteraneo, pero tambe a enfatiza e dedicacion di Aruba Marriott Resort & Stellaris Casino pa ofrece evento di calidad mundial na Aruba.

            E cena di seis curso no a falta di ningun detaye, cada plato a ser elabora cu hopi amor y precision, haci cu e anochi a bira un experiencia inolvidabel pa tur e presente. Chef Charbel a logra combina e sabornan autentico di Mediteraneo cu un toke moderno, resultando den un menu cu ta eleva e standardnan di gastronomia na Aruba.

            E presencia di un chef di tal calibre na Aruba ta un paso mas aden na posiciona nos isla como un destino di excelencia culinario. E evento aki ta marca un otro capitulo di exito pa Aruba Marriott Resort & Stellaris Casino, y nos ta spera cu mas evento asina ta sigui den futuro.

            Aruba Marriott Resort & Stellaris Casino y Chef Charbel Hayek tambe a duna oportunidad na talentonan hoben, esta studiantenan di Colegio EPI, e oportunidad di traha e dianan aki hunto cu Chef Charbel.

            Esaki sigur ta un bunita oportunidad pa e hobennan por a siña y inspira door di e hoben chef di Lebanon y tambe Executive Chef/doño di e restaurant Lady Hawk ubica na West Hollywood.