Edgar Kock a gana premio di ‘Mihor Diseñador’ di evento di Beachwear Glam Fantasy

ORANJESTAD (AAN):  Diasabra anochi a cera parti di Promenade na San Nicolas, pa asina riba e pida caminda aki di Zeppenfeldtstraat a

tene e anochi di “Beachwear Glam Fantasy”, di e organizacion di Miss Youth Aruba.

   Siete candidata a presenta riba caya, cu apoyo total di publico pa asina mustra nan fantasia cu ta completamente dedica na San Nicolas, den nan costuum y discurso rond di esaki.

   Na final di e anochi, a escoge un ganador tambe cu a bin cu e mihor diseño di costuum pa nan candidata.  E premio aki a bay pa Edgar Kock di Mirrors Beauty Academy, kende ta e preparador y patrocinador di Amalia Niebles Diaz.

   El a presenta e anochi ey cu un honor special na e dama icono di San Nicolas, esta ‘Lolita’, kende tabata bende su cos dushinan na tur actividad cu tabatin rond di Aruba.  El a presenta cu un trahe colorido cu su cabes mara na honor di Lolita, y a cana cu un bodypiece cu ta consisti di diferente cos dushi, incluyendo pakinan di bals, chupabebe, y canastanan cu Lolita semper tabata usa ora di bende su productonan.  Hopi original y a resalta e anochi.

   Aki por mira Edgar Kock ricibiendo e premio for di Mary-Jane Kransen kende ta actual Miss Teen Mundial Aruba 2024, y tambe por mira e trahe cu el a crea, riba curpa di Amalia Niebles Diaz di Oranjestad.