Magaly Maduro, director di Bureau Sostenemi ta indica:
*Tareanan di cada ken a wordo claramente defini!
*E caminda pa cana ta mas duidelijk
ORANJESTAD (AAN) – Señora Magaly Maduro, directora di Bureau Sostenemi, den entrevista cu Matutino DIARIO a elabora tocante e acuerdo di cooperacion e institucion aki a firma cu Departamento di Asuntonan Social (DAS).
Señora Maduro a menciona cu nan tin basta tempo trahando riba e acuerdo aki, den cual nan ta pone den un documento cla, kico e tarea di Bureau Sostenemi ta y kico e tareanan di DAS ta.
“Bureau Sostenemi ta unda tur e meldingnan ta drenta, cerca nos ta tuma un screening pa medio di investigacion, anto ora cu esey ta cla, ta dicidi si e caso ta bay Departamento di Asuntonan Social na nan seccion cu ta bay over di famia. Si no ta bay DAS, anto nos ta mande na Directie Voogdijraad”, señora Maduro a relata.
El a informa cu na e momentonan aki, ambos departamento a caba di firma un documento cu paso pa paso ta splica con e casonan tin cu wordo trata.
El a comenta cu den pasado tabata tin discrepancia si un caso tin cu keda na Bureau Sostenemi of tin cu bay Departamento di Asuntonan Social. “Aworaki nos tin claramente defini pa cada hende sa na unda nan tin cu cuminza cu nan trabao”, Magaly Maduro a remarca.
El a agrega cu, en todo caso, e ta haci e caminda mas duidelijk. El a expresa cu, en todo caso, cada caso ta uno riba su mes y un ta tuma mas tempo cu otro.
