ORANJESTAD (AAN): Dr. Hendrikus van Gaalen, Director di Fundacion Respaldo a bolbe enfatisa cu e problematica di salud mental ta algo grandi na Aruba.
Dos siman pasa a check cerca e docternan di cas cuanto hende nan tin cu no ta haya ayudo, pero si ta cay den un grupo problematico, cu ta inclui personanan cu ta den depresion, muchanan y tambe personanan indocumenta.
Tin un grupo grandi cu no ta hayando ayudo y cu ta bay bira mas malo aworaki, Van Gaalen a enfatisa.
Despues di a reuni cu Formador Evelyn Wever-Croes, a bisa, a pensa riba un manera pa wak con por disminui e problema aki ya cu un solucion den un temporada cortico no ta facil y no ta bay logra tampoco hunto cu e otro stakeholdernan, a señala.
Van Gaalen a laga sa cu den e ultimo añanan nan a traha basta duro, pero si ta compara esaki con leu ta aworaki despues di 4 aña despues di e temporada di pandemia ta algo no comparabel.
A splica cu no a pensa cu nan lo por a haci asina hopi y cu hopi mas profesional compara cu 4 aña pasa. A siña cu mester traha hunto den grupo cu otro specialistanan. Por ehempel, aworaki Respaldo tin casi 100 hende, pero ainda ta un grupo chikito pa tur e problemanan cu nan a haya riba nan cabes, a remarca.
Aworaki ta bayendo na un nivel hopi avansa. El a duna algun ehempel. Respaldo tambe ta den KIA y hendenan cu tabata malo y a drenta KIA door di un delito y si nan ta drenta KIA, e ora Respaldo ta sigui atende cu nan.
E idea di esey ta pa baha e delitonan na Aruba tambe door di hende asina pasobra mayoria di e delitonan no ta bin door di hende cu problema mental. "Mayoria no, pero ambos si", a enfatisa.
Tin un 'samenwerking' entre ginecologonan, psicologonan, psikiatranan cu ta sigui di cerca tur hende muher na estado pa wak cu nan no ta den riesgo of cu e muchanan cu ta nace no ta den un problema. Kier evita pa den futuro tin un grupo di muchanan cu problema.
Banda di esaki tin e electroshock, cual ta un tecnica moderno pa trata depresionnan grave. Tin esaki hunto cu ImSan, Dr. van Gaalen a indica.
El a agrega cu tin 8 psicologo cu ta casi yegando na e fin di nan opleiding y ta 4 di Respaldo, 2 di Ministerio di Enseñansa y 2 di SVGA. Tin un 'samenwerking' cu e otro islanan pa yega na un acuerdo riba kico mester haci hunto.
Segun Dr. Van Gaalen, Covid-19 tabata tin un impacto desastroso y doloroso, pero el a haci cosnan bon tambe. Hende a siña pa keda na cas y disfruta cas tambe, pero tambe wak bida di un otro manera.
