ORANJESTAD (AAN) – Den conferencia di prensa di gobierno (demisionario) den su calidad di Formador di e proximo Gabinete, Evelyn Wever-Croes a hiba palabra pa elabora tocante e reunionnan cu hunto cu integrantenan di RAIZ y MEP, el a sostene cu e stakeholders dialuna mas trempan.
“Nos a continua cu e reunionnan den cuadro di formacion y nos a cuminza cu e stakeholders riba tereno di economia y turismo. Nos a reuni awe cu Asociacion di Timeshare, pa nos haya un miho bista con nan ta mira e desaroyo di e industria aki, y kico pa nan ta importante pa e gobierno nobo tene cuenta cune. Nos a papia cu ATIA, cu ta e organizacion di doñonan di trabao, tambe cu Camara di Comercio y cu Triple A”, e dignatario a duna di conoce.
El a indica cu ainda falta varios stakeholder riba e tereno aki, pero debi na otro compromisonan di trabao e no por a continua e mesun dia aki pero awe, y otro dianan den e siman, e lo sigui.
“Basicamente, loke mi por a nota awe ta cu nan ta organizacionnan hopi bon na haltura di tur e desaroyonan cu ta andando, no solamente na Aruba pero den mundo henter. Y cada uno a bin cu un lista di sugerencia riba puntonan cu pa nan ta importante pa haya atencion”, e mandatario a splica.
El a menciona, como puntonan importante pa dicho instancianan, por ehemplo e ley laboral di Aruba y e necesidad pa flexibiliza esaki. Esaki ta temanan cu a bin dilanti practicamente den tur reunion, y tambe a indica cu varios comerciante den e sector hotelero ta buscando aworaki trahado pa, por ehemplo, housekeeping, housemen, etc., y no ta hayando na Aruba, hende pa esaki.
“Pues, nos ta hayando extra atencion eynan y esnan cu por ehemplo ta den FASE of via DPL, pa nos yega na e personanan aki, pa nos por asina yuda e desaroyo economico” Formador Wever-Croes a bisa.
E dignatario a agrega cu pa loke ta trata e sector di turismo, nan a bay hopi riba e tema di medio ambiente y naturaleza y con importante esaki ta pa e sector aki, y tambe pa loke ta concerni e futuro cu nos kier mira pa nos turismo encuanto “calidad of cantidad”.
“Esaki ta e lineanan cora cu a bin dilanti den practicamente tur e encuentronan, y tambe e tema di e reforma fiscal a bin dilanti, specialmente pa ATIA y Camara di Comercio. Nos a brainstorm un poco riba diferente punto cu tin riba mesa aworaki. COHO y Landspakket tambe a wordo menciona, y finalmente cu Triple A, a bin algun tema specifico di e compania mes, cu mester haya atencion” e dignatario a añadi.
Formador Evelyn Wever-Croes a expresa cu e reunionnan a bay bon. “Hunto cu RAIZ y integrantenan di partido MEP nos a tene e reunionnan aki, y nos a haci varios palabracion tambe pa nos continua cu e diferente stakeholders aki, un bez cu e minister encarga ta apunta”, el a duna di conoce.
Formador a reitera cu esakinan tabata bon reunionnan cu organizacionnan profesional y bon prepara, y puntonan cu naturalmente, no ta desconoci pa gobierno saliente, pero si ta importante cu e gobierno nobo tene cuenta cune.
Nan ta purbando di tene un tema specifico cada dia, pero debi na diferente problema di scheduling e ta bruhando un poco den otro, e dignatario a splica, pero awe, en todo caso, ta continua cu e reunionnan aki.
