*Recuperacion a yega mas liher cu locual a wordo anticipa - ORANJESTAD (AAN): Dialuna CEO di Triple A Joost Meijs tambe a sinta cu Formador, pa loke ta e proceso di formacion di e Gobierno nobo, esta Gabinete Evelyn Wever Croes 2.
Despues di reuni cu Formador, Meijs a papia cu prensa y el a indica cu e reunion tabata hopi positivo.
“Na un manera constructivo nos a papia riba e asuntonan actual cu tin dentro di aeropuerto”.
Ta asuntonan cu cual e Gobierno nobo por yuda nos y asuntonan cu cual nos por yuda Gobierno, segun Meijs.
El a indica cu e tin un sentimento hopi positivo riba e combersacionnan cu a tuma lugar.
Segun e CEO di Triple A, unda cu e cooperacion cu e gabinete anterior tabata hopi bon mes, e ta kere cu e cooperacion cu e proximo gabinete lo bay na mes manera.
Pa loke ta e recuperacion na aeropuerto despues cu hopi medida a wordo kita y varios turista for di algun tempo caba a cuminza bishita nos isla bek, Meijs a bisa cu si bo wak con yen e hotelnan ta y cuanto hende ta yega y sali bay for di aeropuerto, bo ta ripara e desaroyo positivo pa loke ta e cantidad di pasahero.
“Awor cu nos ta den luna di Juli, nos ta caba na 80% di e recuperacion compara cu e mesun luna na 2019”.
Den e lunanan cu ta bin nos ta verwacht te hasta mas recuperacion, na caminda pa e punto halto di temporada.
Nos ta spera cu den lunanan di October, November y December si nada serio sosode, nos lo por yega na 100% di recuperacion pa loke ta e mercado Mericano, segun Meijs.
El a splica si cu ainda tin algun mercado cu ta keda atras manera Canada di Latino America.
Tin vuelonan si, pero menos frecuente ainda.
Meijs a bisa si cu e recuperacion a yega bastante mas lihe cu locual cu 3 pa 4 luna pasa tabata wordo spera.
