Mediador Anselmo Pontilius:
ORANJESTAD (AAN)-- Segun Mediador Anselmo Pontilius, pa tur trahado conoce e situacion real di e compania pa cual ta traha, ta haci falta hopi ainda.
No tur compania ta habri buki pone riba mesa cla, pa e trahado compronde kico kiermen operacion, di cualkier empresa, mas ainda respetando e derecho di e trahado. Asina Mediador a splica den entrevista cu DIARIO.
El a agrega cu aunke cu el a mehora bastante, ta un hecho ainda cu hopi trahado, den varios sector, no ta wordo registra debidamente na SVb.
“Y, consecuentemente, si no ta registra na SVb, esey kiermen cu e dunador di trabao no ta paga prima di pensioen, tampoco di AZV, y nos sa e consecuencia.
Esaki ta un tema cu mester atende cu hopi mas profundidad. Nos a mira cu Gobierno a tuma decision pa, entre otro, percura pa un grupo grandi di hende indocumenta haya permiso di trabao, y e pregunta e ora ey ta, si e dunador di trabao cu ta cerca dje, con a bay e ultimo dos, tres añanan? E dunador di trabao a kita placa for di e salario di e trahado y nunca a yega su destino? Kiermen, loonbelasting? Probablemente e lo ta menos debi na e cambionan di ley di loonbelasting, pero sigur prima di AOV, prima pa AZV y pensioen. Tin algun caso di companianan cu no ta cumpli cu nan responsabilidad legal”. Mediador Anselmo Pontilius a remarca.
