ORANJESTAD (AAN): Comunidad ta invita pa un presentacion y entrega di e un buki di señora Olga van der Klooster, titula “Niets zal ik onbeproefd laten.
De Caribische erfgoedcollecties van Anton van Koolwijk: dienaar van God, de wetenschap en de Nederlandse Staat”.
Esaki lo tuma lugar diahuebs dia 22 di januari 2025, pa 5:00 pm na Archivo Nacional Aruba.
Ta trata aki di un obra basa riba un investigacion di 12 aña haci pa historiado arkitectonico y cultura. Banda di e presentacion di e buki, lo tin un charla di señora van der Klooster y exposicion di un parti di e obra aki.
E “Coleccion Van Koolwijk” ta pertenece na un di e coleccionan mas varia di e herencia cultural di Aruba, Bonaire y Curaçao. Pastoor van Koolwijk, trahando como pastor na islanan ABC entre 1871 y 1886, a mira pa su mes e tarea importante pa acumula obheto y informacion di e tempo ey y manda pa Rijksmuseum na Leiden y tambe pa Exposicion Internacional y di Negoshi di Exportacion teni na 1883 na Amsterdam.
E coleccion aki ta cubri diferente sorto di obhetonan di uso diario, pero tambe hopi sorto di cocolishi, mata, palo y otro obhetonan arkeologico y etnografico. E trabao aki van Koolwijk no a hacie su so, pero cu ayudo di un red di hendenan local. E coleccion ta wordo maneha pa varios museo Hulandes. E obhetonan arkeologico y etnografico por wordo topa den depositonan y exhibicionnan permanente di Wereldmuseum na Amsterdam y Leiden.
Den e obra aki señora van der Klooster no unicamente ta trata e coleccion y discripcion di obhetonan, pero tambe lo atende cu asunto di procedencia y tambe destino di e obhetonan y lo por trata e aspecto cu awendia ta hopi na discusion, esta e debolbemento di e obhetonan aki cu for di era colonial a wordo manda Hulanda.
Prome cu e charla di señora van der Klooster, lo tin tambe un introduccion cortico di parti di Comision Nacional di Patrimonio Cultural Intangibel, cu ta bou guia di secretariado di UNESCO Aruba. Aki lo trata di e trabaonan realisa te awor y tambe e proyecto venidero di inventarisacion di costumber, pensamento y storianan cu ta bini for di pasado y cu ta wordo considera como nos Herencia Cultural.
Esaki lo wordo sigui despues pa un presentacion cortico tambe di parti di Archivo Nacional pa loke ta trata e proyecto di Kibaima, cu al final lo mester bira un centro di conocemento y expertico pa cu nos patrimonio cultural tangibel y intangibel.
E presentacion lo ta den idiomanan Hulandes y Papiamento.
