Mediador Anselmo Pontilius:
- Hopi CAO a keda cla den diferente sector
ORANJESTAD (AAN) Mediador di Gobierno, señor Anselmo Pontilius, den entrevista cu DIARIO, a expresa palabranan pa Comunidad di Aruba, deseando un y tur un bon Aña nobo, cu paz y trankilidad.
No obstante, e ta lamenta cu Aruba a habri aña cu bastante inseguridad, specialmente riba caretera, y e ta haci un yamada na comunidad pa “para keto, y esey por hiba nos, kizas, riba unda nos tabata 40 aña pasa, e ora ey”, Pontilius a expresa.
Pa loke ta trata e parti laboral mes, el a comenta cu 2025 a cera relativamente trankil y a habri e dos prome simannan di 2026 bastante trankil.
“Di con? Cantidad di contrato colectivo den varios sector a keda cla den 2025, y ami ta kere cu algun a keda pendiente den 2026, pero mester bisa cu gran parti di e contratonan colectivo, tanto den empresanan estatal den Horeca, cu ta e sector di mas grandi di nos economia, tin acuerdonan formal. Pues, no tin e situacion den cual por spera confrontacion entre trahado, sindicato y doño di trabao. Mi ta kere mas bien den 2027, atrobe cu cantidad di contratonan colectivo lo vence, y bo ta haya bo den e situacion den cual ta mira e debate, manera semper, den e parti financiero, etc., etc”, Mediador Anselmo Pontilius a señala.
Mediador Pontilius a sigui splica cu pa loke ta habrimento di aña cu referendum, loke ta parti di su trabao, practicamente 2025, tabatin menos referendum cu 2024-2023, pues e tareanan tabata, practicamente, bastante limita.
“Nos a dedica na aconseha den varios caso individual, pero no cu tabata tin negociacion y madiacion fuerte, cu a exigi hopi tempo y dianan y anochi”, Mediador Pontilius a subraya.
El a agrega cu awendia tin mas cooperacion entre companianan estatal y sindicatonan, compara cu antes.
“Mi ta kere cu ta necesario tambe, y cada bez cu nos ta bay mesa, specialmente despues di e pandemia, un apelacion nos a haci no solamente na companianan estatal, y riba e companianan mas priva, pa no warda te ora tin negociacion pa CAO sino, periodicamente, informa nan trahadornan kico ta e situacion di bo empresa, con e empresa ta draai, con e entrada y gasto ta, kico e gasto operacional ta. Mas hopi trahado wordo envolvi miho e relacion lo ta den e sentido tambe cu e trahador lo compronde kico ta e situacion real di cada compania”, Mediador Anselmo Pontilius a enfatiza.
