Tin cu bay traha hunto pa mehora calidad di bida y di cuido

Ministro Wyett-Ras papiando riba fortifica y amplia servicio:

ORANJESTAD (AAN): Recientemente Minister di Salud Publico, Asuntonan Social, Cuido di Adulto Mayor y Cuido di Adicto drs. Mervin Wyatt-Ras a haci bishita oficial na Wit Gele Kruis Playa, caminda el a haya un presentancion extenso riba e trabou valioso cu WGK a bin ta hiba pa hopi aña caba riba nos isla.

   Acompaña pa su team, director Edwin Roos a duna informacion riba henter e personal y trabou di cada departamento cu ta cay bou di WGK.

  Entre otro WGK su trayectoria di mas di 65 aña brindando cuido na nos comunidad. Ayudo den cuido y asistencia na cas, cu ta algo cu hopi ta conoci cu ne. E guia y control di baby recien naci te cu cierto edad, caminda ta screen e crecemento/alimentacion y desaroyo, pa mira cu esaki ta uno saludabel. Asina por menciona diferente otro servicio ademas di esun mas recien, cu ta e asistencia pa transporta patient di dialysis na consulta/ tratamento y bek cas.

  Minister Wyatt-Ras a indica cu personalmente a experiencia di cerca e cuido cu nan ta brinda. Hopi ta e pashentnan cu a sa di expresa nan gratitud pa cu e trato ricibi.

  Como ministerio e ta algo cu nos mester keda stimula, pa sigui brinda e cuido di calidad y sostene e trabou cu nan ta eherce. Ta desea exito na tur, tambe minister a expresa di bay fortifica e laso pa asina hunto amplia e mantelzorg cu ta brinda comunidad.