Minister Geoffrey Wever:
ORANJESTAD (AAN): Minister di Finansa, Asunto Economico y Sector Primario, Geoffrey Wever, ta mira bek riba un conferencia di Dutch Caribbean Agriculture, Livestock, and Fisheries Alliance (DCALFA) hopi exitoso cu a tuma lugar durante e ultimo dianan na Boneiro. DCALFA ta un encuentro importante pa futuro sostenibel di agricultura, pesca y cria di bestia den Caribe Hulandes. E participacion di Aruba na e conferencia aki ta di vital importancia mirando e vision y e plannan di e minister cu ta inclui e.o. desaroyo di un Agri-Innovation Park pa Aruba.
Participacion den panel
Durante e conferencia Minister Wever, representando Aruba a participa den un panel strategico, hunto cu diputado Anjelica Cicilia di Boneiro y Recheline Leerdam di St. Eustatius unda a dialoga riba un vision comun pa garantisa seguridad di cuminda na nivel di Reino den Caribe Hulandes.
Roadmap pa desaroyo agricola
Mirando e importancia pa stimula produccion local, mehora seguridad di cuminda y reduci dependencia di importacion di alimento, na final di e conferencia Minister Wever hunto cu coleganan mandatarionan di otro islanan Hulandes den region, a firma un roadmap como un reafirmacion di e Memorandum of Understanding (MoU) firma entre Aruba y e islanan ruman na aña 2023.
Portal digital pa informacion
Durante di e conferencia tambe DCALFA a lansa su website nobo, un plataforma cu ta pone informacion crucial directamente na man di agricultornan, piscadornan y emprendedornan den Caribe Hulandes. E website ta inclui informacion relevante tambe pa financiamento obtenibel manera subsidio pa exportacion y inversion (DHI, SIB), fondonan di EU y microcredito agrario (Qredits), y tambe ta conta cu esfuersonan di capacitacion, coaching y apoyo tecnico.
