Timeshare Association a lansa e documentario ‘Aruba Timeshare Evolution’

ORANJESTAD (AAN): E organizacion di Aruba Timeshare Association (ATSA) a extende un caluroso bon bini na tur invitado y amigonan den timeshare,

pa presencia “Aruba Timeshare Evolution”, un documentario cu a presenta na Marriott Ocean Club Sales Gallery recientemente. E presentacion tambe a haya presencia di miembro di parlamento Jennifer Arends-Reyes,  CEO di AHATA, Tisa Lasorte, miembronan di hunta di ATSA, y varios otro partner den industria di timeshare cu a forma parti den e produccion di e documentario.

   E pelicula ta enfoca ariba kico ta haci Aruba extraordinario - e amor y confianza den tur kende ta yama nos isla un hogar leu di cas. E amor aki ta e fundeshi di e industria di timeshare, anto esaki lo sigui inspira e evolution di timeshare pa generacionnan cu ta bin.

  E lansamento di Aruba Timeshare Evolution tabata un colaboracion di varios stakeholder kende a honra e legato di e industria su pioneronan. Aruba su exito den timeshare no lo por ta posibel sin e esfuersonan combina di e lidernan den e industria. Hunto, nan a forma un futuro cu ta beneficia e bishitantenan, su crecemento economico, y nos comunidad.

  Segun Sulaika Kelly, president di Aruba Timeshare Association, mirando dilanti nos tin pa reconoce e dinamica den e cambionan pasando rond di nos. E generacionnan prome a percura pa crea e fundeshi pa loke nos tin awe, y nos mester ta hopi gradici na nan. Nan dedicacion a haci Aruba un lider den innovacion, den por habri porta n’e concepto di timeshare. “Danki pa bo curashi, y pa bo vision”, Kelly a expresa.

   El a reitera tambe cu den un mundo cu ta sigui evoluciona, expectativanan di e generacion nobo tambe ta cambiando. E bishitante di awe ta buscando mas experiencianan, sostenibilidad, y novedad, anto Aruba mester ta prepara pa adapta y modernisa, pa asina sigura cu e ta keda lidera den excelencia di hospitalidad.

   E produccion di e documentario tabata den man di e director creativo Tina Bislick, den colaboracion cu videographer Tyler Cavallaro.

  Nan a coba den materialnan di archivo, anto entrevista diferente trahado di timeshare, gerencia, como tambe doñonan. Nan a captura un combersacion bibo cu e grandi den timeshare riba Aruba, Raymond Maduro. E documentario ta señala e contribucion cu timeshare a haci pa logra cu Aruba a bira un destinacion asina faborabel y stima awe.

   Videographer Tyler Cavallaro, un hoben profesional cu ta progresando den e mundo audio visual a trece e perspectiva moderno di su generacion cual a pone cu e pasado, presente y futuro a keda alinea bunita cu otro. E documentario ta mustra un experiencia di isla completo, y moderno cu ta ofreci pa medio di e doñonan di timeshare di awe.

   E documentario ta subraya tambe e puntonan di mas fuerte di e industria, e amor grandi cu e doñonan di timeshare tin pa Aruba. Pa hopi di nan, Aruba no ta djis un spot pa vacacion, e ta un segundo hogar. Nan ta regresa tur aña, atrai pa medio di e calor di nos hendenan, e bunitesa di nos isla, como tambe e sentido di ‘ta aki mes mi mester ta’ cu solamente Aruba so por ofrece. E confianza aki ta testament n’e magia di nos isla, anto e curason di e isla su hospitalidad.

   Kelly a bisa cu den e sentido aki, Aruba ta unico - con el a habri caminda pa timeshare bira un pilar di turismo. E autenticidad cu esaki a ofrece, e isla su forsa, anto e lo gui’e mientras cu e ta move bay dilanti den futuro.

   E evento di lansamento pa loke ta e documentario tabata tin como e team di gerencia di host Marriott Ocean Club, Pedro Vargas, Ligenne Trimon, Roderick Schwengle, cu bunita catering di Campeones Cantina, ofreciendo un Premium Bar sirbiendo cumindanan delicioso.

   Den su ultimo palabranan, Kelly a expresa cu e industria di turismo di Aruba ta bayendo dilanti pero mester semper corda cu progreso ta nace for di colaboracion, anto cu e futuro ta pertenece na esnan cu ta prepara p’e awe.

   E documentario lo ta obtenibel pronto ariba YouTube pa mundo henter por mira. Siguiendo e presentacion aki, e invitadonan a haya e placer di duna bon bini na Raymond Maduro, kende a comparti algun detaye riba con el a introduci e concepto di timeshare riba Aruba.