Directora di Tienda di Educacion Ronely Flanegin:
ORANJESTAD (AAN) — Directora di Tienda di Educacion, señora Romely Flanegin, den entrevista cu DIARIO a señala cu eyfo tin demasiado informacion cu ta yega na nos hobennan, podise pa distrae nan for di cosnan importante.
“Anto, nos ta duna mayornan guia y tips, con pa anda cu esaki. Pasobra tecnologia ta algo cu bo no por par’e, e ta un cos cu ta bay asina lihe, pero toch pa trece un balansa pa bo no haya cu e mucha ta mucho activo riba e media, pero tambe ta den deporte y tambe cu na scol e ta bayendo bon. Un bez cu e mayor ta cerca nos pa guia di e yiu, nos ta traha di cerca cu scol y cu otro partidonan cu tambe ta involucra cu e mucha, p’asina e metanan cu nos pone wordo logra mas lihe tambe”, señora Flanegin a señala.
El a comenta cu e pensamento di mayor ta varia, tocante na ki edad un mucha por tin un celular. “Nos mes ta pensa cu e edad aki por ta un tiki mas grandi, pa e mucha cu ta cabando scol basico cuminza uza telefon pa ora e bay scol secundario e tin manera pa contact e mama. Pero nos ta mira cu e edad cu e muchanan ta uza telefon y e uso cu nan ta dun’e despues di scol, esey ta algo enberdad preocupante, y nos a trece dilanti den diferente tayer di trabao cu nos a duna, pa crea un structura, un rutina pa monitor riba esey, y no cu zomaar e mucha ta haya un telefon na un edad hopi jong, y cu e ta use con cu e kier y con largo cu e kier. Mester tin reglanan”, señora Flanegin a subraya.
