Integridad personal ta e demanda mas grandi den proceso electoral
*Empleo paga dor di Pueblo ta basa riba funcionamento di comunidad
*Base legal di eleccion ta entrega di un contracto di trabou na politico
ORANJESTAD (AAN) — Debate politico a bira un forma pa partidonan politico cu ta participa na eleccion, presenta nan mes na Pueblo.
Pa ta honesto, e debate politico ta fungi manera un certamen di belleza of uno di e ramonan den cual gruponan of paisnan ta midi nan mes cu otro.
Candidatonan ta presenta nan mes pa e hurado dicidi kende mester ta ganador.
Den e debate politico, por mira candidatonan di partidonan politico cu ta aspira di wordo eligi como gobernante di e pais, presenta nan plannan na Pueblo, cu no mester di plannan bunita individual pero mester di e garantia cu e candidatonan pa posicionnan den Parlamento, den gobernacion di e pais, na prome lugar ta hende sincero cu no ta busca uno di e cuponan di trabou mas facil pa gana bon placa na henter mundo.
Kico e lista di candidatonan di partidonan politico ta representa?
Personanan cu ta bati na porta di Pueblo pa ofrece nan mes como trahador den un puesto.
Democracia ta haci cu nan mester representa henter e Pueblo di e pais, di e recien naci te na e ciudadano di mas edad, sea cual sea nan raza of sexo.
E sistema di partido politico ta garantiza, cu e partido internamente ta capaz pa conoce problemanan cu ta afecta sectornan di e pais, pero tambe personanan capaz pa atende cu e problemanan aki cu no solamente ta wordo soluciona cu capacidad experto a base di estudio, pero na prome lugar a base di e moral y caracter nacional.
Pa un ciudadano presenta su mes como candidato pa un partido, su prome interes no por ta cu e ta bay disfruta di condicionnan di bida cu e mes no por produci pa su mes, ni bon entrada, pa no papia mes di oportunidad pa uza su funcion como gobernante pa enrikece of engrandece su mes.
Kico ta bienestar di un pais? Kico e poblacion di un pais ta considera como su moral, su base di felicidad, su base trankilidad, su base di seguridad riba tur tereno?
Presenta plan na Pueblo ta sumamente facil. Haci loke bo a bisa cu bo ta bay haci pa asina sirbi bienestar di Pueblo ta otro cos.
Integridad personal di e candidato mester bini na e prome lugar ora papia di eleccion pa dirigente di Pueblo, cu lo maneha tambe placa, negoshi, tur loke por pone hende trompeca den bida, manera tantisimo caso criminal den Corte di Aruba, a trece dilanti.
Eleccion ta e formula pa Pueblo cera un contracto cu ciudadanonan, cu kier drenta servicio di Pueblo y sirbi bienestar material pero tambe bienestar moral di e Pueblo.
Dictadura ta destrui democracia ora moral muri y politiconan abiertamente of scondi, cuminsa practica e tirania di corupion, cu ta entrega derecho di Pueblo na nan grupo di amigo of na e persona cu por entrega nan placa.
E bienestar di tur mucha, tur adulto, tur anciano di tur raza y sexo na Aruba, ta wordo desgracia dor di politiconan cu mester yena nan cartera na forma criminal.
Eleccion ta e proceso sagrado den cual no mester mira cual ta e politico cu palabra mas bunita of kier hunga mas sabi, pero e politico cu ta entrega prueba a base di su curriculum personal, cu e ta hende limpi pa traha cu man limpi pa henter Pueblo, sin abuso di su posicion.
E persona cu ta acepta un contracto di trabou pa medio di eleccion na prome lugar mester entrega prueba di su moral, su integridad pa asina Pueblo por confia caha di placa y bienestar moral di e pais na su persona.
E politico hoben mester ta capaz pa sirbi e votador anciano. E politico di edad avanza mester comprende e exigencianan di un comunidad moderno cu ta sigui avanza.
E politico mester ta parti di Pueblo di Aruba, reconoce como cuna di hende decente, cu un moral halto, cu espirito di luchador na bienestar di Pueblo cu no ta bende interes di Pueblo pa yena su caha di placa personal of disfruta di loke e mes no por produci pa su mes pafor di politica!
