WEB Aruba ta pidi comprension pa servicio afecta
ORANJESTAD (AAN): Un dolor di cabes cu ta birando un reto pa Administracion na WEB Aruba NV. Ta conoci cu Departamento di Servicio na Cliente a drenta su di tres siman di a introduci su sistema nobo di administracion di cliente. Aparte di a haci uzo di WEB su Call Center y WEB Aruba Chat, un total di casi 9 mil cliente a haci uzo di e 'converter' riba webaruba.com, pa haya sa nan Account Number di 10 cifra.
Introduccion di e sistema nobo ta representa mas cu dos aria di trabou dedica, incluyendo construccion, testmento y training extenso pa sigura cu e ta cumpli cu e necesidadnan. Sinembargo, mescos cu cualkier transicion of proyecto significante, e sistema aki tin su `kinderziektes. 'Apesar di nos mihor esfuersonan pa prepara, cierto aspecto por wordo identifica y resolvi solamente unabes cu e sistema bay live.', asina e compania di awa y energia ta informa den un comunicado.
Horario Adapta: Pa por optimalisa operacion di e sistema, gerencia di WEB a tuma e decision pa adapta su horario di loket y di Call Center den e simannan venidero. Ta conseha clientenan pa consulta paginanan di WEB Aruba riba Facebook, Instagram y webaruba.com pa sa e horarionan adapta prome cu bishita WEB na Balashi.
“Nos ta pidi nos pueblo su comprension y pasenshi durante e periodo aki. Nos teamnan ta trahando diligentemente pa atende cu cualke retraso den servicio y pa garantisa un transicion mas suave”, e comunicado ta sigui bisa.
Ta trata di un sistema cu mester administra un promedio di 55 mil cliente pa luna. E team di proyecto, hunto cu departamentonan di Servicio na Cliente y ICT di WEB y e compania cu ta responsabel pa e integracion, ta trahando duro pa soluciona e defectonan inicial. Na mes momento empleadonan di e departamentonan ta duna nan maximo esfuerzo pa siña y traha cu e sistema. Pa loke ta e portal di WEB Care, ta informa cu su funcionamento no ta optimal ainda. Esaki por resulta cu clientenan lo no por log-in na tur momento den e portal. Pa esaki tambe ta pidi comprension.
Pa haya sa nan Account Number, clientenan lo por haya esaki riba webaruba.com uzando e 'converter'. Ta haya e account number tambe riba tur cuenta di awa desde November 2024.
Lo no cobra boet Gerencia di WEB Aruba ta consciente cu e limitacion den servicio a consecuencia di introduccion di e sistema nobo di administracion ta afecta e informacion cu clientenan mester tin pa por haci pago di nan cuenta di awa debidamente. Pa e motibo ey, a dicidi di por lo pronto no cobra e boet cual normalmente ta cobra na momento cu pogo despues di e ultimo fecha di pago. Lo anuncia na tempo na ki momento lo reanuda cobramento di boet pa pagonan atrasa.
