The STEM Embassy ta organizando un evento special na Universidad di Aruba

LeAnn Tromp, di The STEM Ambassy:

• Riba dianan 28, 29 y 30 di Juli awo 

ORANJESTAD (AAN) LeAnn Tromp, di ‘The STEM Embassy’ a duna di conoce den entrevista cu Matutino DIARIO, cu nan ta planeando un evento cu yama “Ki’ta bo stem?”, cual no ta nifica bo bos, sino “Science, technology, engineering and mathematics Camp”. E lo tuma lugar e dianan 28, 29 y 30 di Juli awo, na Universidad di Aruba, y e ta dirigi na hobennan den edad di 12 pa 21 aña.

   LeAnn a splica: “Esaki ta e cuatro ramonan cu ta birando mas popular awendia, tin hopi mas estudio den esakinan y hopi mas trabao tambe. Nos kier duna e muchanan diferente tayer di trabao, den e ramonan aki, p’asina duna nan un tiki mas di confianza si nan kier bay studia esaki den futuro. Hasta si nan ta pensa despues di dos workshop cu esaki no ta pa nan, e ta ok. Alomenos nos a duna nan informacion pa nan sa precies kico esaki ta”.

LeAnn a relata cu añanan pasa nan a haci diferente evento. Na 2022 y 2023 nan a haci “Ki’ta bo stem?” y na 2024 a realiza un Hackathon, y tabata tin un competencia di robotics tambe.

“Nos a wak cu hopi mas mucha tin interes den esaki, anto mayornan tambe ta haya hopi bunita cu e muchanan tin algo pa haci pafo di scol. Pasobra na scol nan ta siña basta pero no ta traha dje hopi ey cu nan man, y esey nos kier pa e muchanan siña mas”, LeAnn Tromp a bisa.

El a comenta cu hopi di e muchanan awendia sa kico nan kier haci, pero sigur tin un par cu ainda no tin idea. “Principalmente muchanan mas jong, 12,13,14 aña ta djis nan kier sa un tiki kico e ta, y ora nan haya sa y wak cu esaki ta algo pa nan, nan ta sigui investiga, anto ora ey na scol nan ta scoge un pakete cu e vak ey aden”, Tromp a indica.

Pa mas informacion tocante e tayernan di trabao por subi e website: thestemembassy.com. Tambe por bay riba facebook of instagram y por sign up pa e evento.

Dia 30 anochi nan a invita diferente compania pa nan bin cu nan booth pa duna e muchanan mas informacion tocante ki trabao tin na Aruba, kico nan tin cu studia pa, por ehemplo, tin un trabao den un di e companianan aki, y e muchanan mes cu a participa den e tayernan, por mustra pueblo, nan famia, etc., kico nan a haci, kico tur nan a traha den “Ki’ta mi STEM?”