Parametronan pa bon informacion riba situacion mundial ta tambalea
*Riba tur tereno tin incertidumbre cu falta di direccion di dirigentenan
*Politica y economia internacional ta sconde un crisis di magnitud enorme
ORANJESTAD(AAN)—Na momento cu den informacionnan di dirigentenan di paisnan y di mundo, e capacidad pa entrega informacion clave y corecto no ta existi, mester papia di un incertidumbre cu na su turno ta indica cu un crisis di magnitud enorme ta e realidad mundial.
Un crisis ta manifesta e realidad, cu hende no ta capaz pa traha plannan basico concreto pa futuro sin menciona factornan cu ya ta amenaza na horizonte y tin probabilidad grandi di destrui planificacion, cu na su turno ta exigi pa traha tambe planificacion alternativa.
2025 a habri cu e certeza cu cualkier momento mundo por conoce un guera, pa cual mundo mester prepara.
Pa Pueblo ta debidamente informa, mester tin plannan alternativo di tur pais, cu ta duna Pueblo e informacionnan corecto di posibel desaroyonan, pa asina e mayornan cu mester manda yiu school, empresanan cu mester duna hende trabou, ancianonan cu mester mira con nan ta haci cu nan pensioen, personanan cu ta dicidi cu Hulanda ta un bon alternativa ora problema bati na porta, por prepara nan mes pa situacionnan cu por presenta.
Cifranan actual di economia mundial y di economia di Aruba tambe, ta mustra den direccion di cambio.
Ora papia di economia y sigur e aorta, e ader mayor di economia, ta papia di turismo cu ta wordo bida a sigui crece na e momentonan aki.
Na varios momento a splica cu no ta trata di e cantidad di pasahero cu a drenta pero di e cantidad di placa cu turismo ta genera den cada sector di turismo, cu su propio indice di posibilidadnan.
Ora pone informacionnan di Aruba hunto, imediatamente un persona cu ta conoci cu turismo, ta yega na e conclusion cu tin algo andando ya cu tipo di turismo cu ta percura ainda pa papia di un aumento di turista, ta consisti di turistanan cu lo gasta menos na Aruba y asina lo percura pa menos entrada.
Democracia ta exigi pa Pueblo ta bon informa y manera ya bisa, pa Pueblo di Aruba ta bon informa, informacion internacional mester wordo analisa pa Pueblo dor di dirigentenan di Aruba.
Uno di e parametronan cu mas ta duna indicacion di stabilidad of falta di stabilidad den mundo di turismo, ta prijs di petroleo cu atrobe a baha pa drumi den braza di e cifra 70 Dollar pa baril.
Un prijs sumamente abou cu lo haci cu atrobe por bisa Pueblo cu prijs di gasolin ta baha, pero tambe ta mishi cu e ambiente di stabilidad mundial, cu ta muriendo un mal morto.
No tin stabilidad na mundo debi na e amenaza di guera, pero tambe na problemanan serio cu ta manifesta nan mes na paisnan cu economianan cu ta determinante pa economia mundial.
Pa loke ta trata Aruba, pone gobernacion di Aruba un banda y ban pa Gobierno di Reino cu ta enfrenta eleccion cu no ta duna un direccion directo ainda pa su resultado exacto.
E eleccion Hulandes ta tuma lugar na un Europa, cu aparentemente tin problema si e bay rumbo solo of luna den un situacion mundial, cu ta produci cifranan hororoso di sufrimento y destruccion di e ser humano.
Situacionnan cu por rementa cualkier momento ta keda dilanti porta di Aruba, cu ta sigur den estado di alerta cu Venezuela no solamente pa un persona perdi pero pa situacionnan mucho mas peligroso y dramatico pa cual tambe DIARIO a adverti Aruba.
Pa colmo awor sangura a dicidi pa adverti cu el a bolbe cu maleza, mientras mundo ta pendiente di e Covid-19 entre otro, cu ainda no a pasa pa historia.
Mientras parametronan, desaroyonan cu ta decisivo, ta papia di un aumento total di inseguridad mundial, e Pueblo mester ta bon informa.
Na e momentonan aki e cerebro humano mester haya oportunidad pa realmente dirigi curpa di tur hende na mundo, pa asina hende por uza su propio capacidad pa prepara pa un segundo final dificil di 2025 pa no papia mes di 2026.
Awor aki pinta un imagen falso di progreso na Aruba, cu forza di body builder den e situacion mundial, ta destrui e mentalidad necesario pa Pueblo uza su mente y su capacidad pa confronta e crisis mundial.
Profesionalnan cu a sigui estudionan necesario awor mester sostene e base cientifico di un comunidad uni pa haciendo uzo di mihor talentonan, manera a pasa durante pandemia, atrobe percura pa Aruba por sigui cana.
Na e momentonan aki e brazanan fuerte cu Aruba mester, ta di e gremionan cu mester haya atencion pa duna nan aporte na nan pais.
E placa cu tin disponibel mester wordo uza no pa metanan politico pero pa asegura cu Aruba por ta bon prepara den un futuro, reconociendo cu Aruba no ta capaz pa midi kico Augustus 2025 lo por trece.
Liderazgo awor ta exigi pa confronta criminalidad internacional cu ta aumenta den e crisis mundial, cu tension serio na paisnan Latino Americano caminda e destino di esnan cu a huy pa Merca pa scapa di Nicolas Maduro, ta desconoci.
DIARIO tin e deber pa informa Aruba. Na momento cu tur informacion local y internacional cu drenta ta papia di un situacion cu por cambia cualkier momento, DIARIO mester bati alarma pa papia di un crisis pasobra tur informacion cu drenta como noticia pa splica e Arubiano pakico Aruba mester ta prepara, tin e frase cu ta splica cu mester cuenta cu desaroyonan inespera por trece cambio di un minuut pa otro!
Pues awor Aruba mester ta bon prepara y informa.
