Prijs di petroleo ta sigui sorprende cu caida di casi 20 Dollar
*Aumento mundial considerabel spera pa sector di turismo
ORANJESTAD (AAN) — Un ola di noticia negativo ta afecta e ambiente mundial na caminda pa e salida di 2023.
Sinembargo tin otro notanan sumamente alentador cu ta alcansa publico, manera e hecho cu den tur e problemanan mundial, prijs di petroleo a cuminsa ta baha hasta bou di 80 Dollar pa baril cerca cierto productornan.
E motibonan ta e problemanan cu ta saca nan cabez na diferente parti di mundo manera Asia y Merca, pero cual sea e motibonan pa publico e ta un motibo alentador ya cu esaki ta nifica cu pa e ultimo lunanan di 2023 y entrada di 2024, e prijs di combustibel por conoce un alivio mescos cu ta e hecho cu otro prijsnan.
Un noticia realmente alentador ta e informenan cu a drenta y cu ta duna indicacion cu por spera un aumento mundial considerabel pa sector di turismo a base di informacionnan pa loke ta trata turismo durante November.
Thanksgiving ta na caminda pa anuncia yegada di dianan di fiesta, productor di actividad economico pa henter mundo y tambe pa turismo.
Informacionnan ta indica cu na Merca ta wordo spera cu e cantidad di turista pa exterior lo conoce un aumento considerabel cu lo por iguala e nivel di mas halto registra na 2005.
E informacion aki a alcansa DIARIO na momento cu ta prepara pa bay imprenta pero ta un informacion sumamente valioso pa Aruba, cu tin Merca como su destinacion mas importante.
E informenan cu DIARIO a ricibi di su informantenan internacional ta completamente di acuerdo cu loke Gobierno Wever-Croes a anuncia, cu ta e recuperacion cu lo continua na Aruba cu a conoce mescos cu henter mundo temponan sumamente dificil.
Segun informacionnan di DIARIO por papia di un clima mundial general pa loke ta trata preparacionnan pa dianan di fiesta 2024, cu ta wordo afecta dor di e desaroyonan negativo na varios parti na mundo.
Rumbo 2024, informantenan internacional ta mustra cu hustamente e pensamento cu desaroyonan por afecta celebracion ta aumenta cerca gruponan grandi, e necesidad pa biaha.
Pa loke ta trata e mercado mas grandi di Aruba, cu ta Merca, sigur por spera pues na final di 2023 un aumento cu yegada di Thanksgiving, ora mas miembro di e comunidad Mericano lo biahe pa exterior.
DIARIO ta pendiente cifranan cu lo confirma loke Aruba por spera na 2024, cu sigur pa loke ta turismo lo por ta sumamente beneficioso pa Aruba, teniendo na cuenta e stabilidad cu Aruba conoce y e ambiente positivo cu e ta entrega na turistanan.
