Dia internacional di derecho di mucha
ORANJESTAD (AAN): Tur aña mundo henter ta para keto riba e fecha di 20 di november como e fecha declara pa Nacionnan Uni como e Dia internacional di Derecho di Mucha.
E motibo pakico ta marca e dia internacional realmente ta pa crea e oportunidad pa educa e publico cu un audiencia mundial riba topiconan di preocupacion pa asina mobilisa interes politico y recursonan pa adresa problemanan global y celebra y reinforsa e logronan di humanidad. E existencia di dianan internacional a bira un herment poderoso pa conscientisacion riba un escala grandi.
Dia Internacional di Derecho di Mucha a worde estableci na aña 1954 y ta celebra esaki anualmente riba 20 di november pa promove union internacional, concientisacion di muchanan rond di mundo y asina trata di influencia e bienestar di e muchanan.
Na 1959 den un asamblea general di Nacionnan Uni, lidernan mundial a adopta e Declaracion di Derecho di Mucha. Riba e mesun fecha di 20 di november, pero na aña 1989 a yega na un acuerdo cu globalmente lo salbaguardia e bienestar di tur muchanan pa medio di e Tratado di Derecho di Mucha. E tratado aki ta un di e tratadonan di derecho humano mas ratifica door di mas pais na mundo. Tin hopi mas atencion pa proteccion di mucha pa nan por desaroya na nan maximo potencial pa medio di e 54 articulonan den e tratado.
E crisis crea door di Pandemia di Covid-19 a resulta den un crisis di derecho di mucha tambe. E consecuencianan di e pandemia pa muchanan ta directo, y si no adresa esakinan lo por dura pa bida largo. Nos por tende rond di mundo e impacto riba e salud mental di mucha, e grado di stress cu nan te ainda ta experienciando. Ta keda na adultonan di tur sector pa percura cu e muchanan ta haya e proteccion y sosten cu nan mester. Ta importante pa adultonan den bida di e mucha ta atento na e sentimento di mucha of hoben y demostra comprension pa e tempo dificil aki.
Mama, tata, maestro, enfermero, dokter, lider político, activistanan, e comunidad religioso, sector priva y media por hunga un papel importante pa haci e Dia Internacional di Mucha relevante den nos sociedad. E fecha aki mester sirbi como punto di inspiracion pa por conscientisa, promove y celebra e derechonan di mucha. Pero tambe pa traduci esakinan den dialogo y accion pa por construi un miho mundo pa nos muchanan.
Celebracion di Diasabra awor: Como cu e fecha di Dia di Mucha ta cay riba Dialuna, e decision a cay pa festeha y observa esaki riba Diasabra 18 di November 2023 atardi.
Esaki lo bay ta na Aruba Carnival & Entertainment Village na San Nicolas for di 3:00 pm te cu 7:00 pm. E lo cuminsa pa 3:00 pm, cu un “Marcha pa nos Derecho” saliendo for di YMCA San Nicolas rumbo pa Carnival Village.
Na Aruba Carnival & Entertainment Village mes lo bay tin actividad pa muchanan, e.o. Dino Jump, Face Paintings, Weganan pa Mucha, careda di Hot Wheels, Rollerskating y tambe Skateboarding.
Riba escenario lo tin presentacion di Karate Group Jin Sei Kan SKIF Aruba. Tambe show di Mini Dazzling Dancers, y Dazzling Dancers, Fluffy Paws. Lo tin Popcorn, Sucu, y Raspao, y bendemento di cuminda tambe. E evento lo ta full gratis.
