Cifranan di National Hurricane Center ta papia un idioma cla
*Avance cientifico ta topa cu e furia di naturaleza cu ta renoba su mes
*Segun cifranan calor y inundacion ta desastre mortal mas importante
ORANJESTAD (AAN) — Awe, na entrada di e ultimo siman di luna di Mei, DIARIO ta habri porta oficial pa informacionnan directo ariba e temporada di horcan cu oficialmente pa region di Aruba ta cuminsa dia Prome di Mei.
Ora papia di condicionnan di tempo, ta papia di e resultadonan di e totalidad di naturaleza, cu hende den pasado a respeta y a considera su guia den exploracionnan importante di mundo, pero cu awor hende kier domina cu inventonan cu ta afecta naturaleza.
Hende tin problema pa acepta cu naturaleza ta defende y renoba su mes pero no segun planificacion di hende.
Den formacion di un horcan, elementonan di naturaleza ta uni nan mes den actividad cu ta cuminsa den nubia y ta caba den fondo di laman, cu di e forma aki ta haya un limpieza total y ta los loke tin den su fondo y deposita nan riba tera.
E coriente poderoso di laman ta contene energia pa forma loke ta bira olanan cu ta subi tera cu un energia destructivo, peor cu tur bom cu hende por inventa.
Un horcan no necesariamente mester ta riba cabez di un pais cu ta wordo afecta pa e peliger di “rip currents”, cu ta olanan cu manera soldat ta subi tera y ta causa daño enorme.
Un horcan ta un fuente di energia cu ta aumenta den circumstancianan cu hende mes a provoca, manera e forma cu tera y laman ta bira mas cayente pa asina crea mas energia peligroso pa e ser humano y su ambiente.
Durante temporada di horcan, condicionnan di tempo cu ta provoca yobida entre otro, ta cambia.
Cu entrada di verano na partinan di mundo cu clima templa, e solo cu ta subi y posiciona su mes mas leu for di e linea ecuatorial (evenaar, ecuador)den su subida ta wordo acompaña pa e Zona di Convergencia Intertropical.
E nomber di e zona ta papia di convergencia, cu ta mustra con aire ta topa y asina ta provoca crecemento di nubianan di yobida, cu carga cu energia, ta causante di mal tempo.
Den e energia cu ta forma den calor, inundacionnan ta causa destruccion na costanan di paisnan cu e topa den su caminda.
Inundacionnan, cu temporada di horcan tambe por causa, pues ta uno di e tragedianan mas mortal.
Na top di condicionnan di tempo cu por resulta fatal, ta calor intenso cu mester considera un asesino enorme si sigui cifranan cu oficialmente ta wordo copila pa asina yega na conclusion di e peligronan mas grandi cu naturaleza ta provoca na mundo.
E cifranan oficial cu a wordo publica siman pasa a base di informacionnan di 2024 dor di National Hurricane Center ta revela pues cu Aruba tin motibo pa ta mas alerta pa forma defensa di antemano pa su base economico sumamente importante cu ta turismo cu tin beach y solo como su stimulacion mas importante.
Aruba no ta directamente riba e ruta mas peligroso di horcannan cu na 2025 mester sigui atentamente despues cu durante ultimo añanan a duna prueba di no ta tene nan mes na reglanan di antes y por ehempel ta drenta Caribe for di Oceano Pacifico y no for di Oceano Atlantico.
Pa 2025 ta spera un temporada di horcan cu un total di sistema mas halto cu loke ta averahe anual.
Manera semper DIARIO a splica, Aruba no por para keto solamente na un horcan pero na tur condicion di tempo cu no ta limita na yobida fuerte.
E calor inmenso di temporada di horcan, cu a base di cambio di clima ta bira mas intenso, sigur mester haya hopi atencion pasobra e lo afecta loke pa comunidad tabata normalidad.
Ora sigui e informacion di loke condicionnan di tempo por haci cu salud di hende, ta mira cu e solo dushi riba cabez di hende, ta forma e amenaza mas grandi pa salud di hende.
E exposicion di hende na solo riba beach sigur conoce un peligro cu ta aumenta na prome lugar pa personan cu problema di salud cu den e temporada di horcan marca pa calor intenso, mester evita exposicion na solo fuerte y calor na tur parti di e pais.
Pa loke ta trata inundacion, por nota e afan pa biba directamente na laman pero mas ainda e euforia di hopi hende pa bay landa ora condicionnan di tempo ta malo.
Ora papia di e situacion di “rip current” ta papia di un forza cu hende no por bringa sin mas. No ta un ola cu sin mas ta kibra pero un fenomeno destructor pa hende, pa edificio pa tur loke ta den su trayecto.
Sin duda e relacion hende y clima, a drenta un etapa nobo den e situacion cu hende mes a crea.
DIARIO lo sigui informa Aruba debidamente pa hunto por enfrenta cambio di clima cu ta encera, cambio di e ambiente natural di cual hende tabata disfruta y cu ta dicidi pa su salud y bida.
Den e confrontacion directo di clima cu salud di hende y peligronan nobo of cu a bira mas grandi, sigur mester sigui guia di autoridad competente na e destinacion turistico Aruba, cu tin solo y laman como su atraccion grandi pa sostene su economia.
