ORANJESTAD (AAN): Departamento di Salud Publico ta alerta comunidad cu e fenomeno di naturalesa referi como “Sahara Dust”
a cuminsa afecta e region y den e siman cu ta sigui esaki lo sigui afecta Aruba ainda mas.
E fenomeno aki no ta nada nobo, e ta ripiti su mes na mas cu un ocasion pa aña na momento cu e stof di Sahara ta wordo transporta a traves di aire pa e region.
Cu yegada di e stof aki, e calidad di aire ta wordo afecta y por experencia aumento den kehonan relaciona cu malesanan respiratorio. Esaki debi cu e aire ta consisti di hopi mas stof cu ta custumbra cu ne.
Esnan cu ta sufri di malesanan respiratorio manera astma, bronkitis, alergia of sinus por presencia aumento den nan sintomanan manera :
- Nanishi cera of ta core awa
- Nistermento
- Wowo hincha of humedo
- Dificultad pa hala rosea
- Tosamento
- Grawatamento di cuero, wowo y nanishi
Stof di Sahara ta ocasiona tambe cu tempo ta bira mas calor pa cual motibo ta recomenda pa durante dia bebe mas likido preferiblemente awa pa tene e curpa hidrata, tambe evita di ta pafo si no ta necesario y pone extra atencion riba baby y adulto mayor riba con esaki por afecta nan.
Departamento di Salud Publico ta conseha tur persona cu ta sufri di un of otro malesa respiratorio pa percura pa tin nan medicamentonan na nan alcance na tur momento y tuma esakinan manera dokter ta prescribi.
Evita di haci actividad fisico den aire liber den e dianan benidero y si tuma nota cu e sintomanan ta empeora, tuma contacto cu bo dokter di cas pa un consulta.
