Parlamentario Jennifer Arends-Reyes
ORANJESTAD (AAN): Recientemente señora Arends-Reyes den calidad di vice-presidente di comision di relacionnan Norte Americano a forma parti di e delegacion di Parlamentario di Aruba cu a viaha pa Washington DC.
E delegacion di Aruba a wordo compaña pa Minister Plenipotenciario Señora Zulema Dabian na diferente reunionnan importante cu ta reforza lasonan pa pais Aruba. Tur esaki considerando cu Merca ta nos mercado principal turistico y cu primordialmente ta provee nos cadena di importacion alimenticio. Riba nivel di estado, un estado manera Maryland a mustra den pasado hopi interes pa traha huntu y coopera cu diferente MOU na beneficio especialmente di nos studiantenan cu por studia na prijs igual cu un studiante Mericano.
Tin mas lasonan di cooperacion cu Maryland y e bishita aki tambe a reforza e interes y disponibilidad pa continua y amplia locual cu tin caba. Tin hopi mas oportunidad pa traha ariba nivel di sport, clima, turismo y educacion. Tambe e delegacion a papia cu conseheronan principal di Senador Whitehouse di Rhode Island, Representante Señora Yvette Clark di New York tambe cu ta miembro di e House of Caribbean Caucus y na final e delegacion a logra papia na US Department of State cu Señora Barbara Feinstein kende ta e deputy assistant secretary di Western Hemisphere. di U.S. Department of State. Tambe e delegacion a bishita e Embahada Hulandes pa un presentacion di Dr Evan Ellis kende ta un Latin America Research Professor U.S. Army War College Strategic Studies Institute.
Señora Arends-Reyes ta wak back riba un viahe di bishita di trabou sumamente interesante y cu hopi balor pa e lasonan diplomatico cu Merca. Alaves ta gradici Señora Zulema Dabian pa su asistencia cu e viahe aki y su trabao pa Aruba.
