ORANJESTAD (AAN): Segun Partido MEP, historia ta algo cu tey pa semper recorda hende di susesonan y berdadnan cu a pasa. Pero, cierto politico tin problema pa corda historia.
Esakinan ta politiconan cu mente selectivo of ta scoge pa corda solamente loke ta conbini nan cu e solo meta pa laga pueblo lubida di hechonan real, informacionnan cu a worde duna, cifranan concreto, combersacionnan y berdadnan cu a pasa.
Y den politica no tin tempo pa hunga e papel aki di ta un politico cu mente selectivo y pensa cu politiconan cu si ta honesto lo no tuma nota di esaki. Partido MEP semper tey pa recorda politiconan cu mente selectivo e berdadero parti di historia y pa asina pueblo tambe por worde recorda di e informacionnan cu e politico mente selectivo kier pa pueblo lubida.
Señora Marisol Lopez-Tromp ta tipifica e politico mente selectivo. Awo direpente pa Marisol Lopez-Tromp, un gobierno di 7 minister mes ta bon.
Mientras cu tempo tabata cunbini’e, pa e no keda afor di gobernacion y haci y deshaci den su carteranan, 7 minister so no tabata bon.
Tempo cu Marisol tabata den Partido MEP, e tabata e di 9 minister. Tempo cu Marisol tabata den Partido AVP, el a sostene e di 9 minister.
Tempo cu Marisol tabata den Partido POR, e tabata e di 8 minister. Y awo cu Marisol ta den Partido MAS, pasobra e no por ta ni di 8 ni e di 9 minister, no ta bon mas.
Direpente Marisol ta lamenta cu no a keda na 7 minister den e gobernacion aki. Esaki nos por considera como un persona hipocrita.
Partido MEP ta sostene un gobernacion di 8 minister especialmente den e retonan grandi cu tin nos dilanti. E pandemia di Covid y e retonan cu el a laga nos pais cu ne niun gobierno na Aruba prome cu Gabinete Wever-Croes I a pasa aden. Y e trabaonan lo bay ta mas intenso y mas hopi cu 8 minister mes no lo ta suficiente. Pero Gabinete Wever-Croes II lo traha cu e mesun forsa y determinacion pa nos pais recupera mas pronto posibel.
