ORANJESTAD (AAN) – Señor Igor Croes, director di Aruba Lions Club, a declara den entrevista cu DIARIO, cu e organizacion aki ta haciendo hopi actividad pa recauda fondo pa yuda mes hende den nos comunidad.
Igor a menciona cu un di e proyectonan di mas grandi Aruba Lions Club tin, ta esun pa yuda e pashentnan den necesidad e cama di hospital of e rolstoel cu nan no por yega na dje.
Otro proyecto ta e “smile mobile” unda cu nos ta bay casnan di anciano pa drecha y polish e protesis dental kibra pa esnan cu mester. Pero aworaki, debi na e situacion existente di pandemia, Lions Club no ta saliendo cu nan “smile mobile” bay casnan di anciano, pero nan tin un laboratorio tecnico unda e famia of amigo di un persona cu ta den cas di anciano, por hiba e dentadura kibra y e ta wordo drecha gratuitamente. Nan mester djis presenta nan ID y mustra cu e persona ta kedando den un cas di anciano. Aunke nan no ta saliendo cu e smile mobile, e servicio pa nos grandinan ta sigui, Igor Croes a reitera.
El a agrega cu e Lio Clubnan tambe ta recaudando fondo pa yuda e muchanan. Tin diferente proyecto y mañan, diasabra 3 di September, nan ta bay recauda cuminda. E meta ta pa cera macuto of caha di comestible y pasa laga nan na cada scol y nan respectivo cabesante lo dicidi cual ta e muchanan den mas necesidad, pa haya esaki. Esaki ta un ayudo di Lions Club. Tambe nan tin e proyecto di parti cuminda pa esnan mas necesita den nos comunidad y nan tin un lista cu nan ta trahando cune.
