*Nan sa cu e situacion cu e werksternan no ta di awo
ORANJESTAD (AAN) – Den e conferencia di prensa convoca pa SKOA, su directora señora Anuesca Baly, a sigui splica encuanto e situacion cu tin cu e werksternan, cu no ta uno nobo, cu e sentimento pa e muchanan semper tabata y ta na prome lugar.
Tocante e prome dia di e aña escolar nobo cu e scolnan di SKOA no a habri, Anuesca Baly a comenta cu e dia ey el a reuni cu e directornan y school-leidersnan, y bin acerca cu e mayornan tabata hopi comprensivo cu e situacion, pasobra nan tambe sa cu no ta di awo cu SKOA ta den e lucha aki. Mayornan sa cu ta na bienestar di nan yiunan cu nan mester ta den un scol cu ta limpi.
“Pasobra si nos ta ripara kico tur e reglanan di DVG ta trece dilanti, bo no por bisa cu ta algo cu por tuma liheramente y cu bare y mop ta tur. Bo tin cu tuma hopi atencion, y locual cu nos a bin ta haci for di comienzo, cu e pandemia a dal for di Maart 2020, cu nos a cera scolnan, nos a habri bek casi na final di Mei pa Juni, y tur cos tabata in place. Y nos, di parti di SKOA, hunto cu nos cabesante y docentenan semper tabata habri, bao e circumstancianan. Aunke no tur cos tabata in place pa cu nos trahadornan di limpieza, pero nos a haci extra mile, durante practicamente un aña escolar completo, bayendo pa otro aña escolar”, Directora di SKOA a indica.
E dama a subraya cu SKOA tin confianza cu tur locual a wordo priminti pa yega na un solucion concreto, ta wordo cumpli cune. SKOA a pidi un garantia y den locual Mediador hunto cu e Comision a bin cune SKOA a puntra pa pone un tiki mas skerpi pa nan. Anuesca Baly a agrega cu e tin confianza cu Gobierno lo sinta pronto. “Ya caba e ta bayendo den e particion di carteranan, y nos ta spera cu ora tur minister haya su cartera, esun di enseñanza cu SKOA ta cay bao di dje, cu nos por sinta di biaha na mesa y nos ta bay discuti esaki. Manera nos a menciona esey ta e palabracionnan cu tin, y nos ta confia cu esaki tambe lo wordo honra”, señora Baly a subraya.
Director di SKOA a acentua cu nan a pone tur hende concerni na haltura di e situacion desde 13 di Augustus. “Nos a manda un carta bisando ‘esaki ta e posibilidad’ pasobra manera tur bosonan sa, nos a papia cu nos trahadornan di limpieza, SEPPA tambe tabata involucra den esaki, caminda nan tambe a entrega cerca SKOA e vastelling cu e trahadornan di limpieza cu a scoge pa keda, pasobra esaki ta un opcion personal, anto nos a pone dia 13 di Augustus ya caba, prome cu scol habri”, directora Anuesca Baly a splica.
Anuesca Baly a expresa cu tur cos ta tuma tempo; gobierno tabata bezig cu formacion y te ainda, y tur hende ta druk. Pero SKOA a pone tur hende na haltura, pues e posibilidad tabata tey.
