Tecnologia mester fortalece dignidad humano y e bienestar comun

Prome Minister Mike Eman:

ORANJESTAD (AAN): Durante un lectura cu Arsobispo Charles Jason Gordon memey di diferente lider religioso y participante, Prome Minister Mike Eman a expresa su gratitud cu e Arsobispo a acepta e invitacion pa comparti e reflexion moral di Iglesia Catolico tocante Inteligencia Artificial. Den su introduccion, Eman a bisa cu e mundo ta busca sentido y direccion den un tempo unda tecnologia ta avansa rapidamente. Segun e Prome Minister, justamente den e contexto aki ta importante pa tin un compas moral cu por guia e decisionnan cu nos ta tuma como sociedad. E charla a tuma luga diabierna mainta na Cas Veneranda.

Eman a explica cu e reflexion moral di Iglesia riba e tema aki no ta algo nobo, sino cu tin su origen den e Rerum Novarum di Papa Leo XIII, cu a responde na e cambionan grandi cu Revolucion Industrial a trece. Aunke e revolucion ey a crea progreso economico, tambe el a trece problema serio manera trabou infantil, condicionnan di trabou inhumano y falta di respet pa dignidad humano.

Pa motibo ey, Iglesia y gobiernonan a cuminsa formula principionan etico pa proteha hende. Durante su discurso, Eman a referi na e filosofo Martin Buber y su concepto di “I and It”, caminda un relacion por keda solamente funcional y transaccional. Como ehempel, el a menciona e relacion entre un turista y un taxista, cu por evoluciona for di un simple servicio di transporte pa un amistad berdadero ora personanan conoce otro, comprende otro y crea un conexion humano.

Tambe el a menciona e filosofo Emmanuel Levinas y su concepto di “The Other”, enfatisando cu un sociedad sano mester mira e otro persona como algo cu tin dignidad, deseo y aspiracion propio. Segun Eman, tecnologia no por haci cu nos ta perde e capacidad pa comprende otro hende ni pone distancia entre e personanan.

E Prome Minister a señala cu precisamente pa motibo di e desaroyonan tecnologico rapido, Gobierno di Aruba a adopta e bienestar comun (the common good) como un di e principionan cu ta guia su politica publico. El a indica cu e concepto aki no por sobrebiba sin un fundacion moral fuerte, construyi pa famianan, comunidadnan, iglesianan y otro institucionnan social.

Na final di su introduccion, Eman a conta con e encuentro cu Arsobispo Gordon anteriormente a resulta den un dialogo tocante e bienestar comun. Ora el a lesa e enciclica nobo riba Inteligencia Artificial, el a mira e oportunidad perfecto pa invita e Arsobispo Aruba y comparti e reflexion aki cu lidernan y representante di diferente sector den nos comunidad.

El a gradici Arsobispo Gordon pa su presencia, y tambe e personanan cu a yuda haci e encuentro posibel, expresando su speransa cu e lectura lo contribui na un dialogo profundo tocante con tecnologia por sigui sirbi humanidad, respetando semper dignidad humano y e bienestar comun.