Stichting Rancho awo tin nan mesun boto

Señor Clifford Rosa:

*Un soño cu a bira realidad despues di 16 aña 

ORANJESTAD (AAN): Stichting Rancho ta invita comunidad di Aruba pa asisti na e 16th Aruba International Regatta, cu lo tuma luga di 10 te 12 di juli 2026 na Surfside Beach. 

Un parti di celebracion pa e fundacion ta cu despues di 16 aña, un soño a bira realidad unda cu nan ta presenta nan mesun boto specialmente pa caredanan di botonan miniatura pero tambe pa otro proyectonan cu Stichting Rancho tin den plan. Esaki a bira posibel danki na e fondonan di participacion cultural di Hulanda. 

Segun señor Clifford Rosa di Stichting Rancho, e boto cu ta hiba e nomber ‘Rancho Awo’, ta un posesion hopi importante pa Stichting Rancho mirando cu un parti esencial den e statutonan di e fundacion tin di haber cu e futuro di pesca y e piscadonan y tambe den transporte maritimo y e mundo maritimo. 

Señor Clifford ta splica cu e evento den e fin di siman aki, ta trata di e careda di botonan miniatura, cu segun e ta enfatisa, ta nos herencia cultural intangibel pero tambe tur loke cu ta rondona e mundo maritimo. Señor Rosa a duna di conoce cu e caredanan di botonan miniatura ta un tradicion maritimo Arubiano cu a wordo preserva y promove durante hopi aña. 

E regata a cuminsa ayera tardi na Regatta Village unda participantenan a haya oportunidad pa registra y ricibi informacion. Awe Diasabra 11, for di 9:00 am lo cuminsa cu e prome caredanan. Diadomingo 12 di juli ta sigui cu e caredanan y na final lo tin e celebracion di clausura cu The Originals. 

 “Esaki ta un bunita oportunidad pa famianan, hobennan, amigonan bin hunto pa disfruta e dia di hunto na un evento di nos herencia cultural. Stichting Rancho ta sigui comprometi na preservacion di nos herencia maritime, cultura y tradicion”, señor Rosa a remarca.