Huez a papia claramente di portanan di corupcion cu ta wordo habri - Caso reconteo di voto a expone delito cu a wordo comete den eleccion - Proceso electoral 2021 no por cera sin investigacion oficial di crimen
ORANJESTAD(AAN)— Eleccion 2021 a bira mas cu un simpel eleccion pa Aruba. Na caminda y durante e proceso electoral 2021, Aruba a wordo confronta cu diferente asunto, cu a haci cu den sala di Corte di Husticia, Huez a expresa su mes riba e peligronan cu ta wordo forma pa nos sistema electoral.
Na momento cu e sistema electoral di Aruba ta na peliger, e proceso democratico cu ta fundeshi di e Estado di Derecho di Aruba, ta na peliger.
Secrecia di voto a wordo confirma como un asunto sumamente serio dor di Huez mescos cu e hecho cu partidonan politico no por pone ningun tipo di presion riba votadornan cu mester ta liber den nan decision na urna electoral.
Ta spera cu e siman venidero e proceso electoral 2021 ta wordo conclui cu formacion oficial, pues huramentacion, di un gobierno nobo pa e periodo gubernamental y segun resultado di eleccion 2021.
Tin diferente asunto pendiente pa nan atende y uno di nan sigur ta e hecho cu Benny Sevinger, cu por traha como Miembro di Parlamento, por haci esaki pasobra su detencion preventivo den e caso Avestruz a wordo suspende.
Un caso cu su propio abogado, na un forma historico, a bisa cu lo tin base aunke e abogado a bisa cu Benny Sevinger a bira victima di otro hende.
Pero tin mas asunto urgente pa Parlamento atende despues cu Huez a a dicidi cu Kiesregister no por wordo entrega sin mas na partidonan politico, manera e partido AVP tabata exigi.
AVP den durante e proceso electoral a trata te final pa haya tur informacion di e registro di votadornan pa asina evita cu tin ciudadano cu lo a keda sin vota si nan no bay busca e ciudadanonan cu keda sin bay vota na cas.
Mucho mas serio tabata e reconteo cu AVP exigi y cu Huez a rechasa pasobra e exigencia di AVP tabata basa riba e hecho cu nan por a produci como prueba con hende a vota, portretnan di formularionan di voto secreto.
Aki un crimen riba su mes a wordo comete dor di personanan cu a pone portret di voto secreto den publicidad y manera Huez a mustra a duna prueba di un tactica cu ta habri porta pa crimen, pa corupcion, ya cu portret cu ta prohiba den votacion secreto por wordo uza, pa cumpra voto.
Te awe no a tende mas di e asuntonan aki pero nan mester haya atencion den Parlamento.
E veredicto di Huez den e caso di portret di voto secreto a habri caminda pa un investigacion di Ministerio Publico na origen di un crimen, di portret di un voto secreto cu a wordo depone.
E documentonan necesario mester bay Ministerio Publico di un forma of otro y den esaki Parlamento tin e tarea pa habri caminda pa Ministerio Publico, cu ta e ala di Husticia, investiga kico a pasa cu eleccionnan pa Parlamento, cu ta otro parti di e Trias Politica.
E formulario di eleccion den cual e forma cu a vota pa Mike Eman a bini dilanti den e forma cu a uza e potlood cora pa vota, mester wordo investiga dor di Ministerio Publico pa evita corupcion y crimen contra leynan di eleccion secreto di Aruba.
Esaki ta e unico forma pa palabranan di Huez haya valor den e proceso democratico cu mester keda sin pregunta habri.
