Pagonan di casi Mey Miyon di Lotto pa Deporte na Tera Group

Sumanan presenta pa accountantnan a wordo confirma pa gerencia - Di Januari pa Maart 2018 pago di casi 176 Mil Florin a wordo haci -  DIARIO ta presenta pruebanan di confirmacion di sumanan

ORANJESTAD(AAN)- Cuanto placa ta wordo gasta door di Lotto pa Deporte na mercadeo y relacionnan publico?

Documentonan cu a cay den man di DIARIO a causa sorpresa.

E documentonan aki ta a base di confirmacionnan cu representante di Tera Group, Angelique de Cuba, a manda pa Lotto pa Deporte a base di informacionnan cu Accountantnan Ernst & Young a trece dilanti.

Den cartanan y resumen di cifranan, cu awe DIARIO ta presenta como prueba, Lotto pa Deporte ta mustra Tera Group cu segun accountantnan, Lotto pa Deporte mester paga na Tera Group dos suma.

E prome suma ta 312.046,01 Florin cu Lotto Pa Deporte mester paga Tera Group pa mercadeo y relacionnan publico durante e periodo di Januari 2017 te 27 di November 2017.

E otro suma ta pa 175.862,62 Florin pa e periodo di Januari 2018 pa Maart 2018.

E asistente di gerencia di Tera Group. Angelique de Cuba, ta confirma e informacion aki na Lotto pa Deporte.

Esaki ta nifica cu durante e trabounan di accountant na Lotto pa Deporte a wordo descubri pa presenta Lotto di Deporte na publico, e compania Tera Group lo a ricibi casi Mey Miyon di Florin durante e lunanan menciona.

DIARIO ta en busca di mas informacion riba e asunto aki y e contractonan cu tin entre Tera Group y Lotto pa Deporte.

Tera Group ta ocupa su mes cu trabou publicitario di companianan, cu kier haci promocion pa nan productonan.

DIARIO ta en busca di mas informacion riba e pagonan aki y otro gastonan di Lotto pa Deporte  pa asina presenta na su lectornan.