ORANJESTAD (AAN) – Presidente di Federacion di Trahadornan di Aruba (FTA), señor Hubert Dirksz, a splica den conferencia di prensa yama
en conexion cu nan di 24 Congreso Statutario e siman aki, cuminzando dia 15 di September, cu den tur Congreso semper tin resolucionnan ta wordo tuma.
Dirksz a menciona cu tin momentonan cu Gobierno ta atende cu mas diligencia y concentracion riba e temanan cu ta bin dilanti, pero tambe ta asina cu hopi biaha esey no ta e caso.
E sindicato no ta wordo informa mientras cu hopi biaha FTA ta desea cu, ora nan presenta nan temanan, e resolucionnan cu ta wordo pidi pa e Congreso, discuti y aproba, e instancianan concerni, no solamente gobierno, pero e fraccionnan di Parlamento, dunadornan di trabao, organizacionnan no gubernamental, tene cuenta cu ora cu un grupo di trahado, representando tur e miembronan di e Sindicato di mas grandi di Aruba bisa algo, esaki ta pasobra tin un necesidad.
Dirksz a subraya cu FTA ta spera cu e gobierno na turno aworaki; esta, e gobierno nobo tin atencion pa e posicion y pensamento di e sindicatonan cu ta sali for di e clase trahado.
“Lamentablemente, ta asina cu nos sa cu hopi biaha tin e tendencia cu ora un caso ta hopi dificil e ta wordo hala un banda. Y esey nos por mira, diariamente, cerca nos mes; tin ora, tin cosnan cu nos ta pone pa haci, pero nos ta hale un banda. Semper, den lista di prioridad tin prioridadnan mas importante cu otro, anto nos ta considera cu cada keho, cada critica, un expresion di un persona, un miembro di nos, nos ta dune balor mescos cu tur e otronan. Y mi ta kere, esey ta conta pa Gobierno tambe; si tin un ciudadano cu ta trece un keho dilanti, e mester haya e atencion debido y den e caso aki sindicatonan, sigur, mester haya un miho atencion y mantene un miho relacion cu gobierno y cu e gobiernonan den futuro, pa atende cu e problemanan di e clase trahado.
E situacion social na Aruba, y sigur social-laboral, mester haya mas prioridad. Den e caso aki nos ta urgi gobierno, pero tambe e parlamentarionan, pa pone mas atencion riba e calidad di bida di e trahador. Si nos ta considera e ser humano central, e situacion social mester haya mas atencion. Nos no por permiti cu e situacion financiero di pais Aruba, berdad den un crisis hopi dificil pa atende, pero pa motibo di esaki nos no por perhudica y causa un problema social mas grandi. Y sigur, e gremionan sindical ta esnan cu por yuda bo, no solamente cu solucion, pero carga e problema hunto y busca solucionnan hunto”, Presidente di FTA a conclui.
