ORANJESTAD (AAN): E modelo talentoso y stima pa tur, Tanique Chan, a biaha pa New York,
na unda e lo forma parti di e pasarelanan na New York Fashion Week 2023 cu varios diseñador y modelonan internacional. Tanique no ta un hoben desconoci na Aruba, pa varios aña Tanique ta formando parti di The Chaz Modeling & Talent School. Y cu su talento Tanique a sa di resalta como un modelo excepcional.
Tanique a representa Aruba aña pasa na Republica Dominicana den e evento Agnes Universe na unda e la logra e titulo di Reina del Tropico. Akinan e portanan a habri pa Tanique, na unda tabata tin interes pa Tanique modela na fashion shownan internacional. Tanique lo ta riba pasarela diadomingo 12 di februari 2023 na New York Fashion Week caminda e lo modela diseñonan di e conocido diseñadora di Puerto Rico, Wanda Beauchamp, cu trahenan exclusivo di Wanda Beauchamp Girls Couture.
Otro luna Tanique lo ta modelando tambe na Los Angeles Fashion Week. Aruba mester ta hopi orguyoso di su hobennan talentoso cu ta sigi resalta den e mundo di moda y beyesa.
