Abogadonan a reclama di a haya e documentonan hopi laat
ORANJESTAD (AAN): Diahuebs mainta e hombernan J.R.R. di 36 aña, G.O. di 37 aña, y M.M. di 34 aña a presenta dilanti Hues di Corte di Husticia, pa e caso penal cu Ministerio Publico a cuminsa contra nan, y conoci como ‘Caso Anglo’.
Haya placa pa traha prueba falso di vacuna: E acusacionnan cu Fiscal a presenta den Corte contra e trio aki ta cu entre 1 Maart 2021 te 14 December 2021 y conhuntamente cu seis of mas otro persona, a participa na un organizacion criminal cu a falsifica pruebanan di vacuna y/of facilita pruebanan di vacuna contra reglanan.
Nan ta worde acusa di como empleado di Gobierno den funcion di contratista na DVG a tuma placa for di hendenan pa asina registra cu nan ta vacuna y/of hinca informacion den e computer di DVG, sabiendo cu e vacunanan no a sosode. Fiscal ta acusa J.R.R. di tabatin un cantidad di cocaina cun’e riba 14 December 2021.
Abogadonan a critica: Hues a bisa cu e intension tabata pa un “regie zitting” y kier sa si abogadonan tin peticion. Fiscal a bisa Hues cu e no a haya ningun peticion di e abogadonan y ta supone cu lo no tin ningun deseo. El a propone pa 30 Maart 2023, trata e caso henter parti di mainta.
Abogadonan mr. Emerencia, mr. Zara y mr. Croes a reclama cu 2 dia promer, nan a haya tur e documentonan di e caso y nan no a haya suficiente tempo. Nan a pidi pa duna nan tempo pa asina nan evalua tur cos pa asina dicidi si nan ta desea di scucha testigo(nan) of laga haci cierto investigacionnan.
Pospone caso pa otro luna: Hues a bisa cu e ta kere cu mester pone un otro “regie zitting”. El a bisa cu lo ta mucho mas mihor un otro fecha. El a propone pa e caso Anglo aki sigui riba 9 Maart 2023 pa un otro “regie zitting”. E dia ey lo bay dicidi ki dia tratamento di e caso lo por tuma lugar. Esaki lo ta 1.30 di merdia.
Abogado mr. Zara a bisa cu e ta pidi adelanta na Fiscal pa manda un copia di e combersacionnan cu a scucha. E abogadonan a bisa cu lo percura pa un siman promer cu 9 Maart a manda nan peticionnan. Hues a dicidi cu 9 Maart 2023 lo tene otro “regie zitting” pa regla tur e cosnan cu mester sosode.
