Tabatin exitoso Buscamento di Webo na Colegio San Augustin

ORANJESTAD (AAN): Prome cu Paasvakantie a cuminsa, dirigentenan di Colegio San Augustin MAVO na San Nicolas a dicidi na haci algo divertido pa e alumnonan.

   Esey ta encera un ‘Buscamento di Webo’ inespera cu a pone e alumnonan cuminsa aglomera den tur skina riba tereno di scol, pa asina trata di haya premio pa esaki.

   Ademas di e Buscamento di Webo, den e lokaalnan a tene actividad di hungamento di wega di mesa, y esey a inclui wega di carta tambe.

   Cu e forma special aki di entretenimento, docentenan ta spera cu e hobennan a drenta un temporada di vakantie special, unda nan por goza di e dianan liber, y cu esnan cu ta den examenklas lo pone extra atencion na estudio, como cu ‘School Examen 3’ ta na caminda.