Alumnonan di Colegio Nigel Matthew bishitando Bishop University na Canada

ORANJESTAD (AAN): Manera DIARIO ta treciendo dilanti pa basta tempo caba, e alumnonan di H4 y tambe HL2 di Colegio Nigel Matthew di San Nicolas ta bishitando Canada!

   Nan a traha hopi duro pa recauda fondo, y hasta organisa un Feria, y rifa pa yega na placa.  Siman pasa un grupo di 80 alumno a sali y a yega na Canada unda ainda tin sneeuw ta cay den luna di April aki.

   E studiantenan a bay cu 12 guia di scol, y nan lo tey te Diaranson 10 di April venidero.

   Na Canada nan lo bishita diferente “college” y universidad cu Minister Endy Croes di Gobierno a firma un acuerdo, entre otro, Sheridan College, Bishop’s University, Niagara College, Seneca College y Ontario Tech University. E meta di e biahe educativo aki ta pa e studiantenan tin un miho bista di kico e scolnan avansa na Canada ta ofrece y cual estudio ta ricibi financiamento di Arubalening.  Pa e viahe, e hefe di delegacion ta Ricky Arends, administracion ta Laura de Cuba, y Cedrick Kelly cu e parti operacional.  A nota cu Rector Ralph Croes tambe a forma parti.

   E potretnan aki awe ta di nan bishita recien na Bishop’s University, unda nan a wordo ricibi pa e Hunga Directiva di Faculties, cu a papia franco cu e studiantenan.  Despues di a ricibi un almuerzo ofreci pa e Universidad, nan a cana rond pa e.o. subi riba dak di e edificio Nicolls na e campus, y aki a bay mira e Bishop’s University Astronomical Observatory.  Esaki tin un telescope PlaneWave 17” (cu diafragma di f/6.8) cu ta wordo usa pa enriquece e experiencia di studiantenan, y ta yuda e studiantenan cu un otro herment pa expande nan horizonte.

   Pafo tabatin par di stoel poni, y aunke e tabata mey-mey di sneeuw, e alumnonan a probecha di e ocasion pa cool down nan body y actua comosifuera ta na beach nan ta.