ORANJESTAD (AAN): Prome Minister Evelyn Wever-Croes a duna di conoce cu ainda e no a haya un 'update' relaciona cu e negociacionnan pa loke ta e refineria.
El a indica cu den luna di Mei, e companianan ta bay indica si e ta bay door of no ta bay door. Nan ta biniendo Aruba rond di dia 20 di Mei y te na e momento ey por tin un mihor bista di e situacion di e refineria.
E compania cu Refineria di Aruba (RdA) ta negociando cu ne cu ta Quanten LLC f Quanten Aruba Consortium, nan ta bay remodela y rehabilita e refineria y nan lo bay inverti hopi den dje pa asina por tin un refineria nobo cu ekiponan nobo creando tambe cuponan di trabao interesante, e mandatario a indica.
Si esey no ta bay door gobierno ta bezig cu plan B cu ta Eagle LNG cu ta un facilidad di LNG na e mesun lugar di e refineria y esey tambe ta bayendo hopi bon y di nan tambe lo haya sa e luna aki con e situacion ta, a agrega.
Wever-Croes a sigui bisa cu e compania aki ta na Aruba aworaki.
Tambe tin e plan C, pero ta spera cu pa fin di luna por tin e contesta satisfactorio cu a keda cla cu e refineria, asina e mandatario a declara durante su programa Live cu Tanchi Eve.
