ORANJESTAD(AAN)—Cu boca grandi y cu un actitud di Tarzan, Mike Eman ta bolbe pidi Aruba pa vota pa su persona.
Ora mira kico Mike Eman a produci den Gobierno di 2009 pa 2017 y kico Mike Eman ta produci riba caya cu 8 Mil voto cu Aruba a entrega su persona na 2017, e pregunta logico ta bira pakico Mike Eman kier pa Aruba vota pa su persona.
Ora traha un lista di loke Mike Eman a haci den gobernacion di Aruba a base di rapportnan obhetivo di instancianan manera CAFT y tur entidad oficial y independiente di Aruba, ta mira cu e mayor produccion di Gabinete Mike Eman tabata tres caso cu te awor a termina den man di Ministerio Publico y e rapport Bo Aruba, cu ta pone hasta diabel fluit den fierno.
Den porta di eleccion, e pregunta grandi ta keda, kende a dirigi Gobierno Mike Eman pasobra aparentemente Mike Eman no ta na haltura di nada cu lo tabata pasa den su gobierno.
Su Ministronan ta na careda. Hasta e Ministro cu tabata su “back to back” ta riba e lista oficial di sospechoso den un caso cu conoce hende den “voorarrest” mientras Corte di Husticia mester sigui atende e caso di Paul Croes cu a wordo sentencia den Prome Instancia, mientras Refineria di Aruba ta emiti un holor, cu ta pio cu tur huma cu difunto Citgo lo por a produci.
Kico Mike Eman a haci pa Aruba? Kico Mike Eman a produci pa Aruba? Dolor di cabes? Debe pa Pueblo paga “cu orguyo”? Album di portret di Mike ta hunga importante rond mundo? E dolor di un Pueblo cu el a pone ta baila y ta bati man pa su persona mientras Aruba tabata zink bou su maneho?
Francamente nos kier topa cu un rapport oficial cu ta papia bon di e gobernacion di Mike, cu aparentemente Mike Eman mes no conoce.
Nos ta lansa y ta sigui lansa e pregunta mas importante di tur, na final di casi cuatro aña, cu Mike Eman a presta di mantene 8 Mil voto di Pueblo di Aruba riba caya, mientras Alfred M. Sneek tabata fungi como lider di Oposicion cu Mike Eman a nenga for di 2017.
Si na e momentonan aki Mike Eman tabata den Parlamento, e lo a haya su mes forsa pa bisa con por tabata cu e no tabata na haltura di loke su Ministronan tabata haci y hasta ta acusa Ministerio Publico di loke por wordo considera como kiebra di Codigo Penal cu no por conoce imparcialidad.
E tempo di gobernacion di Mike Eman a sirbi pa e destrui entrada di Aruba, introduci debe nacional y proyectonan pa pueblo paga, reemplasa Valero cu Citgo cu tur e gastonan cu esaki a nifica pa Aruba y destrui stabilidad financiero y economico di Aruba.
Si Mike Eman tabata na haltura cu nada por ta robez cu e forma cu Benny Sevinger a atende cu asunto di tereno, e mester por a entrega e prueba awor na Huez Comisario y na Parlamento di Aruba (si e tabata den Parlamento), cu ningun momento algo a bay robes cu asunto di tereno.
Si Mike Eman a actua manera ta spera cu un Prome Ministro lo a actua, lo e no a firma e proyecto Citgo cu Nicolas Maduro, y laga na Richard Arends, Mike de Meza, floristeria, trahado di su ATV, Alwin Koolman, entre otro pa haci y deshaci manera nan tabata kier den Refineria di Aruba, manera e rapport di Refineria di Aruba ta trece dilanti.
Es mas. Mike Eman lo no tabata sabi di e contracto cu Mike de Meza a logra pa Richard Arends ni cu Richard Arends a firma pa Refineria di Aruba, mientras e tabata Ministro.
Na cierto momento e pregunta ta keda atras kico Mike Eman tabata sabi como Prome Ministro, despues cu el a hura cu e lo no perde interes di Aruba for di bista.
Un pregunta sin contesta pasobra Mike Eman a logra di keda leu for di Parlamento y a uza caya como su luga preferi pa no responsabilisa su mes dilanti Pueblo di Aruba, cu el a destrui for di momento cu el a asumi poder na 2009, manera tur rapport, tur cifra, realidad di Aruba y di Reino ta trece dilanti.
