Ta lansa campaña di microchipping atrobe pa garantisa e siguridad di tur mascota 

Minister Arends:

ORANJESTAD (AAN): Aruba a implementa un Ley di Cacho pa enfrenta e creciente poblacion di animalnan cu ta biba riba caya. Den e prome mandato di Gabinete Wever Croes, a desaroya un plan nacional pa aborda e situacion di cachonan riba caya. Den e di dos mandato, e Ministerio di Naturalesa a asumi su responsabilidad pa e bienestar di animal y a adapta e plan na National Plan for Stray Animals (NPSA). 

Maneho

            Durante e ultimo periodo,  a colecta datonan, ehecuta pasonan di e plan y evalua nan resultado. Nos comunidad ta enfrentando un reto serio debi na e cantidad di cacho cu ta circulando den nos barionan. Nos Centro di Control di Cacho ta completamente yen y e fundacionnan cu ta traha den e tereno aki a yega na nan capacidad maximo.

            Ta evidente cu e enfoke actual, cu ta poni enfasis ariba e control di cantidad di cacho, ta trata e simptomanan y no ta resultando manera lo mester y ta creando mas problema. Aunke e plan a ser diseña pa atende cu un problematica serio, ta keda claro cu no ta suficiente pa trata e problema na su origen.

            Pa e motibo aki, ta necesario introduci un maneho diferente cu un enfoke preventivo y holistico pa garantisa e bienestar general di animal door di mehora e relacion entre e hende y animal.

            Minister Arends ta menciona cu e ta desea di wak un Aruba cu ta ser conoci como un pais respetuoso y protector di tur ser bibo incluyendo e animal. E ministro ta continua ta bisa cu ta vital pa ciudadanonan tur comprende cu e problematica di cacho y pushi riba caya no ta un problema di e animalnan mes, sino di nos hendenan.

            E falta di amor, empatia, respet y sentido di responsabilidad pa nos animalnan ta resultado di abuso, crueldad y e cantidad alarmante di cacho y pushi cu ta ser bandona door di nan mesun doñonan.           Den un sociedad unda nos ta conoci pa nos hospitalidad, creatividad, y dinamismo, ta lamentabel cu nos no ta refleha e mesun respet y amabilidad na nos bestianan domestico. Minister Arends ta menciona cu e maneho nobo lo ser trata na inicio di e aña nobo cu e colaboracion di stakeholder pa nan participacion, prome cu e wordo publica. 

Campaña di Fin di Aña

            Nos ta drentando den e temporada di fin di aña, cu ta un periodo alegre pa mayoria di nos hendenan, pero ta un periodo di tortura y miedo pa nos animalnan. Nos ta lansa nos campaña di microchipping atrobe pa garantisa e siguridad di nos mascota durante e celebracionnan di fin di aña. E medida aki ta manifesta e compromiso di Ministerio di Naturalesa pa sigui garantisa e siguridad y bienestar di nos mascota den tur ocasion.

            Pa finalisa, Minister Arends ta pidi tur hende pa bira doñonan mas responsabel pa nan mascota. Evalua bo situacion bon prome cu busca un mascota nobo pa asina preveni e situacion caminda no por sigui provee cuido pa nan. Hunto nos por traha pa crea un Aruba unda nos ta conoci no solamente pa nos hospitalidad, sino tambe pa nos respet pa tur ser bibo, incluso esnan cu no por papia.