BOGOTA: E anuncio di president di Colombia, Gustavo Petro, di un posible asociacion di nan compania estatal Ecopetrol, cu esun venezolano Pdvsa pa explora gas y crudo na Venezuela,
a causa asombro grandi cerca monton di Colombiano pa e inconveniencia ambiental, politico, y economico di e iniciativa ey.
“Ta hopi probable cu Ecopetrol lo bay bira socio di Pdvsa den explotacion di posnan di gas y petroleo na Venezuela,” ta loke Petro a laga sa Diasabra na Caracas despues di reuni cu president Nicolas Maduro.
E anuncio a ocasiona sorpresa na Colombia, pasobra na e pais ey si e ta defende e fin di exploracion y explotacion di crudo riba teritorio colombiano pa motibonan di medio ambiente, pues e ta sinti cu e pais mester haci su parti pa enfrenta e crisis climatico, cu segun el a bisa, lo bay elimina bida di tur hende riba e planeta.
Hasta den su prome reunion dilanti Asamblea General di Nacionnan Uni na September 2022, el a haci e pregunta: “Kico ta mas venenoso pa humanidad: Cocaina, carbon, of petroleo?” Y el a bisa cu e uso di e ultimo dosnan ta wordo tolera aunke nan “por elimina henter humanidad”.
Observadornan ta haya cu Petro ta birando incoherente! E no kier pa explora mas gas y petroleo na Colombia pa asina yuda cu e transicion energetico di humanidad... pero ta bira socio na Venezuela si pa explora. Petro a lubida cu na Venezuela tambe e lo bay afecta humanidad.
Varios ex-Ministro di Colombia a indica cu e anuncio di Petro ta carece di logica y di coherencia.
