ORANJESTAD (AAN): Mirando cu recientemente tabata den noticia cu varios mucha a keda contagia cu Covid-19 na un MAVO scol y cu a elimina e medida obligatorio di uza tapaboca,
Sharline Koolman di Departamento di Salud a splica cu en berdad tabata tin varios caso bao di algun hoben bao di 18 aña pero esakinan no tabata casonan grave.
El a remarca cu bao di 18 aña por keda haya Covid-19. Nan lo porn pega otro y nan lo por bay cas pega un hende cu no ta vacuna.
Pesey a pidi pa mantene mas tanto cu ta posibel e medidanan. Na un scol MAVO caminda e hobennan tin cu move bay den un klas pa otro, ta keda stimula pa mantene e protocolnan y e uzo di tapaboca.
Jeugdgezondheidszorg ta esun cu ta controla e parti di scolnan y Departamento di Malesanan Contagioso (DBZ) ta duna asistencia na momento cu tin algun caso y a yuda cu e cuarentena of e isolacion, a bisa.
Ta keda na e scol pa mantene e reglanan mas tanto cu ta posibel. Ta berdad cu tin mayornan preocupa, pero si na cas tur hende ta vacuna e ora e contagio no lo tuma lugar.
Aworaki locual ta constata ta cu bao di 18 aña, e muchanan ta haya e virus, pero no cu nan ta bira asina malo y cu nan mester hospitalisa. Esey no a sosode y no ta sosodiendo tampoco, Koolman a enfatisa.
