APA: Sistema di control y test ta funciona - ORANJESTAD (AAN): E crusero cu a sali diamars for di Aruba pa Corsow y pa Sint Maarten, a raporta diahuebs atardi cu dos pasahero a test positivo pa Covid-19.
Esaki mientras cu tur pasahero riba 18 aña ta completamente vacuna y a haci un test por lo menos 72 ora prome cu sali for di Sint Maarten pa regresa Merca.
“Cu esaki Celebrity Cruiselines a demostra di tin un bon sistema di control y di test, cu ta detecta pasaheronan mesora”, asina Marc Figaroa, director di Aruba Ports Authority NV a splica.
Celebrity Millennium ta e prome crusero pa cuminsa opera den Caribe. Mundo henter tin wowo riba e proceso adapta y cu protocolnan di salud nobo den e industria aki. E estado di Florida na Merca, for di unda mayoria crusero ta sali pa islanan Caribense mes ta esceptico ainda y tin casonan den Corte andando pa convence gobierno Mericano cu e sistemanan di control ta funciona.
Cu e caso aki ta subraya un biaha mas cu e industria tin protocolnan bon hinca den otro pa cuida su tripulacion, su pasaheronan y e destinacion.
E compania di crusero a sigura cu ambos pasahero ta kedando hunto den camber y cu nan ningun tin sintoma. Asina mes a isola nan riba e crusero te ora cu yega Sint Maarten mañan, unda lo baha y e biahe a termina.
“No tin motibo pa panico, pasobra Covid-19 a bin pa keda. Nos djis mester percura pa nos sistema di test, detecta y isola mesora ta funciona y esey a keda demostra. Tanto na Aruba, hunto cu DVG, a reenforsa tur e medidanan aki, como tambe riba e crusero mes unda tin un lista di medidanan pa cuido di salud”, asina Marc Figaroa a sigura.
Manera por ripara, ta exigi un COVID test prome cu termina e biahe y ta ey a descubri e dos pasaheronan cu, aunke ta contagia, no tin sintoma y ta sinti nan mes bon.
“E prome crusero aki a sirbi tambe pa nos coleganan na Aruba Ports Authority hunto cu DVG por a repasa tur e medidanan existente y garantisa cu pasaheronan y tripulacion no tin Covid ora yega nos isla. Y asina nos lo sigui tambe den e simannan cu ta bin, ora yama bonbini na mas crusero den nos waf”, segun Figaroa.
