WASHINGTON: E director Carissa F. Etienne di Pan American Health Organization a haci un yamada e siman aki na tur autoridadnan nacional y local di paisnan cu ta core riesgo cu Horcan, pa nan prepara pa e temporada di 2021.
El a adverti cu Covid-19 y e potencial destruccion debi na biento duro, y tambe inundacion lo por haci preparacionnan aun mas critico cu normal.
“Nos mester salvaguardia nos pais y teritorionan contra e doble menaza di Covid-19 y temporada di horcan,” Dr. Etienne a bisa. “Nos mester sigura cu servicionan di salud ta completamente operacional pa salba bida y proteha e bienestar di poblacion prome, durante y despues di horcan. Nos mester tambe ta sigur cu e cuido di emergencia, hospitalizacion, Intensive Care Units, laboratorio, y centronan di isolacion y di cuarentena ta protehi y funcionando.”
Manera ta conoci, e fecha 1 di Juni a marca e comienzo di e temporada di Horcan den Atlantico, y e biaha aki tin pronostico cu e lo ta 60% mas actividad cu normal, segun US National Oceanic and Atmospheric Administration (NOAA). E pronostico ta cu lo bay tin entre 13 pa 20 tormenta, incluyendo seis pa 10 horcan, di cual 3 pa 5 lo bira horcan grandi.
PAHO ta trahando pa suministra material di emergencia y asisti pa sigura facilidadnan critico den paisnan na Latino America y Caribe.
Pesey Diahuebs mes, PAHO a tene un reunion di preparacion cu representantenan di e agencianan di coordinacion di desastre di tur pais. E reunion virtual aki ta pa identifica recursonan y ahusta preparacionnan y plannan di emergencia, y a inclui panelistanan di Organizacion Mundial di Meteorologia (WMO), National Hurricane Center di NOAA, tambe e Centro di Coordinacion pa Preveni Desastre Nacional na Centro America.
DIARIO a compronde cu na Aruba ya caba diferente stakeholders ta trahando riba e plannan pa cu preparacion di Horcan.
