ORANJESTAD (AAN) — Sin duda e virus Covid-19 a pone mundo cabes abao y cu varios industria Farmaceutico a haci investigacionnan profundo pa por a brinda un vacuna di emergencia,
y purba frena e situacion alarmante cu a presenta y cu ainda sigui ocasiona contagio, hende hospitaliza, y incluso mortalidad, mas tanto awo door di e variante Delta.
Afortunadamente, aworaki tin varios vacuna cu a prueba di ta efectivo, pero specialmente esun di Pfizer, cual ta esun cu tin na Aruba, y cu mas tanto e ciudadanonan a, y ta tuma.
No obstante, tin varios persona den nos comunidad, cu ta yegando na e seis lunanan post vacunacion (dos dosis), y nan a cuminza pensa kico pa haci prome cu bin un di tres dosis.
Meymey di nan preocupacion tin cu a bin na e idea di haci un prueba di anticurpa post vacunacion, pa haya sa si nan tin suficiente anticurpa ainda, of si nan a merma casi por completo.
E test di anticurpa, generalmente, ta wordo haci na personanan cu a haya e infeccion of ta sospecha cu a haye, maske cu sintomanan leve. E prueba aki si por prueba cu hende asintomatico, por a haya e virus, y di e persona ta depende si e ta tuma e vacuna of no.
Pero pa personanan cu ta vacuna, segun e Agencia Sinc (Spaña) y tambe The New York Times, ta splica e vacunacion ta proteha e persona contra e sintomanan mas grave di Covid-19 di manera no ta necesario haci un prueba di anticurpa pa confirma esaki. E ta splica cu e obhetivo di e serology ta pa detecta casonan cu no a wordo identifica durante un infeccion leve of asintomatico, pero e no ta determina e nivel di proteccion di e vacuna.
Segun e informacion, un persona cu a haya e dosis completo di vacunacion ta tarda mas of menos dos siman despues di e di dos dosis, pa desaroya e maximo proteccion contra e formanan mas grave di Covid-19, pero for di su prome angua ya a cuminza desaroya defensa cu ta wordo reforza pa e di dos shot. Por ehemplo, e personanan cu a recibi e vacuna Pfizer/BioNTech, a yega nan pico di inmunidad siete dia despues di su di dos dosis.
Pues, no ta necesario pa haci un test di serology. “E eficacia di e vacunanan ta hopi halto”, Jose Angel Hernandez Rivas, vocal di e Federacion di Asociacionnan Cientifico Medico di Spaña (FACME), ta indica cu no ta necesario comproba e grado di inmunidad, cu excepcion di pashentnan cu alteracionnan grave di e sistema immune of cu ta haya tratamento cu por compromete e respuesta serologico.
Ademas, e ta reitera, e testnan di serology no a wordo formula pa determina e nivel di proteccion despues di e vacunacion, sino pa conoce si un persona a supera e infeccion di SARS-Cov-2 cu anterioridad, mediante e deteccion di anticurpa den sanger.
