ORANJESTAD (AAN) – Gobernador Alfonso Boekhoudt, den su discurso en conexion cu apertura di Aña Parlamentario 2021-2022, a elabora ampliamente,
no solamente riba e importancia di e sistema democratico, pero tambe riba e pandemia (Covid-19) y con gobierno y parlamento por traha riba e posibilidadnan cu esaki ta ofrece, pa diversifica Aruba su economia.
“Nos por tin diferencianan di opinion riba tur tereno. Pero un cos nos como Arubiano mester por confia den dje ta cu, irespecto ken ta na mando, semper e balansanan democratico cu pueblo kier cuida, lo wordo restaura danki na e sistema democratico vigente den Reino, cu ta aplicable aki tambe y cu hopi otro pais den region ta anhela. P’esey institutonan ta sumamente importante tambe pa garantiza e balansanan democratico. Nos mester ta hopi cauteloso pa no mina esakinan, pasobra hustamente e institutonan aki, y e ordo legal democratico cu nos ta biba aden, ta mantene nos libertadnan y derechonan riba pia.
Den e aña parlamentario cu ta habri awe, gobierno y parlamento conhuntamente ta bay sigui traha riba e oportunidad y posibilidadnan cu e pandemia aki a ofrece. Y cu esaki, lo sigui fortifica pilarnan di democracia den nos pais pasobra calidad di nos democracia ta depende di un structura transparente, responsabilizacion y bon gobernacion. Gobierno tin e compromiso pa sigura implementacion di e proyectonan y iniciativanan pa aumenta transparencia y combati corupcion y pa implementa un plan integral riba e maneho di integridad di acuerdo cu e mihor practicanan den Reino. Lo introduci y aplica na un forma activo e Sistema Nacional di Integridad di e organisacion Transparency International.
Un pais ta logra crecemento economico solido y sostenible fomentando stabilidad economico y financiero. E pandemia a subraya e necesidad di diversifica nos economia. E maneho economico consistiendo di e 6 sectornan prometedor, caminda e sector agricultor, economia circular y industria creativo ta forma un parti cardinal di dje. Nos a mira e importancia di seguridad alimenticio y estimulo di actividadnan agricultural. Gobierno a mira un aumento di interes pa e sector aki y e posibilidad di innovacion cu tecnologianan moderno contribuyendo asina na un desaroyo economico sostenible. Lo continua cu e proceso di eliminacion di e burocracia innecesario cu ta causa frustracion y tardanza cerca e clientenan di departamentonan gubernamental. Den esaki transparencia ta esencial y e proyecto di e-government lo continua na tur nivel di nos aparato gubernamental.
Esaki ta e base pa un clima di inversion sano cu lo conduci tambe na mas cupo di trabao y mas oportunidad empresarial. Empleo ta e vinculo mas directo entre actividadnan economico di un pais y e aumento di e nivel di bida. P’esey ta asina importante pa inverti den e desaroyo di e recursonan humano y pa promove seguridad di empleo. Hopi hende a perde trabao durante e pandemia aki of ainda no ta cobrando un salario completo. Gobierno lo crea condicionnan structural y duradero pa evita perdida di empresa y cupo di trabao; principalmente pa nos hendenan local. Empleo mester ta digno, decente y cu oportunidad igual pa homber y muhe, cu salarionan husto cu ta supera necesidadnan basico”, Gobernador Alfonso Boekhoudt a subraya.
