AUCKLAND: Cientificonan a caba di haya sa, cu bo por siña bacanan con pa usa un toilet, mes facil cu bo por siña un mucha chikito.
Kizas hasta mas facil. Cientificonan a dicidi na test esaki, y 11 di 16 baca a siña con pa usa e toilet yama ‘MooLoo’ ora nan tin di bay urina.
Mescos algun mayor di mucha chikito, e investigadornan a usa un treat dushi pa por anima e bacanan pa pasa door di un porta y bay urina den un hoki special. Y a dura solamente 15 dia pa entrena e bacanan jong. Compara esey cu muchanan chikito, algun ta dura hopi mas cu esey.
Nan a descubri cu bacanan ta siña mes bon compara cu muchanan di 2 te 4 aña di edad. Esey segun e autor di e estudio, Lindsay Matthews cu ta un cientifico di comportacion di animal na University of Auckland na New Zealand, cu a traha cu coleganan riba e test na un laboratorio pa investigacion di animal na Alemania.
E estudio a sali publica e siman aki den e journal Current Biology. Ta conoci cu cantidad grandi di urina por ta un asunto serio pa medio ambiente.
Urina ta contene nitrogeno, y ora cu bo mezcla esey cu material fecal, e ta bira amonia, cu ta un problema di medio ambiente, cu awacero acido y otro problemanan. Pero e por contamina awa cu nitrate y crea polucion den aire den forma di nitrous oxide.
Hopi urina mes: Hecho ta cu bacanan ta urina masha hopi mes. Un solo baca por produci como 30 liter (8 galon) di urina pa dia. Na 2019, e componente nitrous oxide a forma parti di 7% di tur gas di greenhouse na Merca.
Cientifico Brian Hare di Duke University, a bisa cu e no ta sorprendi cu bo por train baca pa bay urina den un hoki special, pero e ta sorprendi cu ningun hende a yega di demostra esaki prome cu bacanan.
Si acaso por haci esaki na gran escala, e ora animalnan cu por usa toilet ta bay yuda criadornan y companianan haya forma mas facil pa maneha productonan di sushi di animal, y reduci emision di gas greenhouse. Esey segun profesor Donald Broom di bienestar di animal na University of Cambridge na Inglatera.
Na e laboratorio na Dummerstorf (Alemania), e investigadornan a imita un training di mucha chikito, pues pone nan den un hoki special y warda te ora cu nan a urina, y duna nan un recompensa den forma di un liquido hopi dushi. Corda cu baca tambe gusta come cos dushi.
Pero si e baca a urina pafo di e hoki special, nan tabata haya un splash di awa frieu.
Despues di esey, nan a laga e bacanan cana normal den e facilidad bao dak, y a bin ripara cu ora nan tin di bay urina, 11 di nan a pusha pa drenta den e toilet special, a urina, y despues haya nan recompensa.
E test aki a wordo haci solamente cu urina, y no a haci esaki cu e baca ta defeca. Pasobra aworaki ta urina ta e problema di mas grandi, por lo menos na Europa. Pero nan ta pronostica cu lo por train baca pa bay defeca den cierto lugar tambe.
