ORANJESTAD (AAN)—Den e parti final di su disertacion den conferencia di prensa, Diahuebs di e siman aki, Director di Oficna di Turismo (ATA), Ronella Croes, a subraya cu “ta hopi importante pa nos cana mas lihe posible riba e trayecto di recuperacion turistico
y, consecuentemente, economico, y pa papia di bienestar total di nos pais”, agregando cu precisamente pa e motibo aki, autoridadnan concerni a tuma diferente paso.
E pasonan ta consisti di: baha e cantidad di casonan positivo di covid-19; sigui stimula residentenan pa vacuna. Y, den e aspecto turistico, hopi importante ta e maneho di entrada.
“Cambionan den e maneho di entrada, sigur ta impacta e fluho di bishitante. Di con mi ta bisa esaki tambe? Pasobra e cancelacionnan cu nos a mira den e ultimo simannan, locual mi a caba di ilustra, ta pa diferente motibo. Obviamente, hendenan cu tambe ta biahando pa Aruba ta test positivo, pues nan mester a cancela nan viahe. Bo tin tambe e preocupacion di e bishitante pa cu e casonan positivo na Aruba y nan miedo di por pega cu e virus y haya nan mes pega aki cu insolacion, pa algun dia adicional, y tambe por tin e parti di e test. Pues, e rekisito cu Aruba a haci mas estricto na Luna di December, pa asina mitiga importacion di e virus, ta pone cu ta mas dificil cu e bishitante por cumpli cu e rekisito aki, y demostra den periodo di dos dia prome cu e sali bin pa Aruba, cu el a conduci su test di PCR y el a test negativo. Pues esaki ta un dificultad cu a presenta su mes, y nos ta conciente di esey” e director di ATA a relata.
Pa ultimo, Ronella Croes a bisa cu hopi importante tambe ta, e hecho cu e nivel di riesgo eleva, pa medio di CDC di Merca, a hiba Aruba di un nivel 3 pa 4 y esaki ta un factor importante cu e consumidornan turistico di Merca ta sigui esaki, y esey tambe ta motibo di cancelacion.
“Esaki, por cierto, tin tur atencion di autoridadnan concerni y mirando e tendencia di casonan cu ta bahando, ya caba ta den contacto cu CDC pa asina convence, y purba di pusha pa e cambio di nivel di riesgo tuma lugar mas lihe posible”, CEO di ATA a subraya.
